Shillong, Nohprah 05
Ka Dorbar Shnong ka Mukroh ka la aiti ïa ka jingthoh sha u Myntri Kam Pohïing jong ka Sorkar Pdeng u Amit Shah, da kaba pan ïa ka jingtohkit jong ka CBI halor ka jingjia ha ka 22 tarik u Naiwieng, 2022 ha kaba 5 ngut ki nongshong shnong ki la ïap ha ka jingshah siat jong ki pulit ka Assam.
Ka dorkhast kaba la aiti lyngba u Lat ka Jylla Meghalaya, u CH Vijayashankar ha ka sngi Thohdieng, ka kyntu ruh ïa ka Sorkar India ban pynbeit kloi ïa ka jingïa kajia pud Assam-Meghalaya bad ban bthah ïa ka Jylla Assam ban pynsangeh noh ïa baroh ki jingtrei ha ka thaiñ Mukroh kumba la batai da ka jingpynbna ba la pynbna da ka JHADC ha u snem 1968.
“Ngi kyntu ïa ka Sorkar India ba kan pynkloi ïa ka jingtohkit jong ka CBI bad ban pynbeit ïa ka jingïa kajia pud ban pynkut noh ïa ka jingjynjar jong ki nongshong shnong ka Shnong Mukroh,” la ong katkum ka dorkhast.
“Ngi ngat ha ki jingshah lehbeiñ bad shah pyndik na baroh artylli ki Karbi kiba hap hapoh ka jingpeit ka Sorkar Assam bad ka KAAC namar ka jingïa kajia pud ka Assam Meghalaya kaba dang ïaid shakhmat,” la ong ka dorbar shnong.
Ki nongshong shnong jong ka Shnong Mukroh ki la mad shibun ki jingshah lehbeiñ bad shah pyndik ha ki kti jong ki pulit Assam, ki shipai khlaw Assam, bad ki shipai khlaw jong ka Karbi Anglong Autonomous Council haba ki leit rep ne leit ot dieng.
Ka jingkam jong ka Jylla Assam bajan mar shiteng na ka Shnong Mukroh ka hap hapoh ka jingpeit jong ka, ka Dorbar Shnong Mukroh ka pyrshah jur, kaba kdew ïa ka jingbatai kaba bakla ïa ka ‘notification’ jong ka snem 1951 kaba la pynmih da ka Sorkar Composite Assam ha kata ka por.
Ka dorkhast ka pynpaw ruh ïa ka jingpom pathar ïa ki khlaw ki btap kiba dei jong ki nongshong shnong ka Mukroh ha Salang, Mukroh, bad kiwei-kiwei ki jaka da ka Jylla Assam bad ka KAAC, wat hapdeng ka jingpyrshah kaba jur da ka Dorbar Shnong Mukroh.
Ki nongshong shnong jong ka shnong Mukroh, ki la mad ïa shibun ki jingshah thombor ha ki kti jong ki sengbhalang jong ka Karbi, kiba kynthup ïa ki kynhun treimon sngewbha jong ka Karbi National Volunteers (KNV) bad ka United People’s Democratic Solidarity (UPDS), naduh u snem 2000.
Katkum ka jingïathuh jong ka dorbar shnong, ki jingjia ki kynthup ïa ka jingshah pynïap ba shyrkhei jong ki 6 ngut ki nongshong shnong ba kynthup ïa u khynnah rit ha ki lehnoh ka KNV ha ka 8 tarik u Rymphang, 2003, ha khlaw Umlaphiah, Shnong Mukroh. Kine kiba shah pynïap ki long u Dik Sumer, u Phun Hasem, u Dia Myrten, u Pro Hasem, u Wen Samaiang (18 rta) u TreiborTalang.
Ka dorbar ka la ïathuh ruh ba ki lehnoh ka KNV bad UPDS ki la dawa pisa na ki paid Khasi Pnar kiba don ha Block I bad II bad ha Mukroh, da kaba maham ïa ki ba kim dei ban rep ha ki jaka ba don jingïa kajia khlem da ïoh jingbit shwa. Ha u bnai Risaw 2005, ki kynhun ki la dawa khajna kaba T.10 lak shisnem sha ki nongshong shnong jong ka Mukroh.
U Secretary shnong ka Mukroh u Bah Precious Sten u la ong ba ka shnong ka dang shu dep ban kynmaw burom ïa ka jingdap lai snem ka jingshah siatïap jong ki 5 ngut ki nongshong shnong ha ki ktang suloi jong ka Sorkar Assam bad ha katei ka jingrakhe ki la rai ban pynsngew ha u Lat ka Jylla ïa ka jingeh jong ki.
Ka jingpynsngew ki nongïalam shnong ka Mukroh sha u Lat ka long ruh ban kyntu ïa ka Sorkar Jylla ban shimkhia ïa ka jingpynbeit ïa u pud u sam bad ka Assam ha kaba na ka por sha ka por ki nongshong shnong ki ju mad ïa kane ka jingeh.
