Shillong, Nohprah 05
Ka Mawlynrei ka la lah ban khur ïa ki lai point ba nyngkong eh hadien ba ka la lah ban pynliem ïa ka Laitkyr-hong da 2-0 kol ha ka jingïakhun jong ka Group-B ha ka lympung ïalehkai SSA Champions Cup 2025 ha ka sngi Thohdieng ha SSA Stadium, Polo.
Ïa kine ki ar kol, ka Mawlynrei ka la ïoh ban thep ha baroh ar ki wat jingïakhun lyngba u Alem Khongwir (33) bad u Kerryland Mawlong (83), kaba la wan hadien ba na kane ka thup (group), ka Shillong Lajong FC bad ka Nongkseh SS&CC ki la lah ban pyntikna ïalade ban jam shakhmat ha kane ka jingïakhun.
Kumta ha kaba kut jong kane ka jingïakhun, lai tylli ki kynhun ki la ïoh ban khur mar lai point katta ka Laitkyrhong, Maw -kriah West bad Mawlyn-rei bad ka jingïalehkai ba khatduh na kane ka thup kan dei ha ka sngi Saitjaiñ, ha kaba ka Nongkseh SS&CC kan ïakhun pyrshah ïa ka Mawkriah West.
Haba phai sha ka jingthep ïa ki kol, u Oresterwell Langshiang u la ïoh ïa ka kabu ban ïarap ban pynbuh ïa ka bol sha ka phang kaba la don u Alem, uba la mareh wut ban ïoh tehlakam ïa ka bol bad ban rah kham shakhmat na ka bynta ban khalah pat ïa ka bol kaba sam lyngba ïa u rangapkol ka Laitkyrhong, u Lamkupar Dkhar.
Ka kylla miet ka long ba dei ka kynhun ïalehkai ka Laitkyrhong kaba la lah ban tehlakam ïa ka jingïakhun, kaba hangne la mih paw kiba bun tylli ki kabu ksiar ïa ka ban ïoh ban pynkhih lem ïa ka jar bad kiba kham paw bha ki dei ki kabu ba la ïoh lyngba u Learninstar Warlar-pih bad Wallamsuk Nongkhlaw, hynrei kaba kut ka long ba kim shym la lah ban pynurlong pat sha ki kol.
Hynrei ha ka khep ba ka Laitkyrhong ka dangñion bha shakhmat, ka Mawlynrei lyngba u Alem, ka la ïoh ïa ka kabu ban rah shakhmat ïa ka bol, kaba hangne u Alem nalade shwa u la shut jam bha ïa ka bol kaba la lah ban kyrda ïa ka da u Lamkupar, bad kane ka bol ka la poi hajan ki kjat jong u Kerry -land,, uba khlem pynlehnohei ïa kane ka kabu ksiar.
Da kumta, kane ka jingjop kan long ka jingkmen ïa ka Mawlynrei, kaba watla kam shym la lah ban pynkhlaiñ ïa la ka jong ka kynhun, hynrei ka jingïohlad jong ka ban ïakhun ha kane ka lympung, kan ai mynsiem ïa ki rangïalehkai bad ïa ki nongpynïaid ba da kumno kan lah pat ba kan kyntiew ïa la ka rukom ïalehkai na ka bynta ka samoi ïalehkai ka ban sa wan jong u snem ban wan.
