Shillong, Nohprah 07
Ki bor District ki dang ap ïa ka jingai jingbit jong ka ïingbishar ba kin pynkit noh ïa u dewïong ba 3039-92 MT ba tih beaiñ na ka shnong Rajaju bad Diengngan, South West Khasi Hills sha ka depot jong ka Coal India Limited (CIL).
Ïa une u dewïong yn sa die lilam katkum ka Mines and Minerals (Development and Regulation) Act, 1957, hadien ka jingai jingbit ka ïingbishar. Ki bor district kila leit tied ïa ka jingkhang ka ïingbishar ban pan ïa ka jingbit ha ka ban pynkit noh ïa u dewïong.
“Tang mar syn pynmih ïa ka hukum da ka ïingbishar ba dei khmih, ka kam ban pynkit ïa u dewïong bala tih beaiñ sha ka depot No 7 ha Nongjri, kan sa sdang noh,” ong ka Justice BP Katakey Committee ha ka interim report ba 34, ba la aiti sha ka ïingbishar Meghalaya High Court.
Ki bor district kila kyrpad ruh ban ai pisa na ka tnad Mines & Resources (DMR), Meghalaya, ban pynlut ha ka baikit bai bah ïa une u dewïong. La kyntu ïa ka DMR ba kan pynkloi noh ha ka ban pyllait ïa ka pisa.
“Ka DMR, Meghalaya ka dei ban ai jingmynjur wut wut ïa ka jingtyrwa jong ki bor District ban pyllait ïa ka pisa,” ong ka kaiphod.
Une u dewïong ïa mynta u don ha ka shnong Rajaju bad Diengngan bad ka jingpynkit ïa ki kan shong eh ha ka jingmynjur jong ka ïingbishar bad ka jingbud ryntih katkum ki aiñ ki kyndon kiba don.
