Imphal, Nohprah:
Ki bor pahara bad ki pulit ka Manipur ki la kem ïa bun ngut ki riew kieng atiar kiba don ha ki kynhun kyrshan lehnoh bapher bapher ha kylleng ka jylla hapdeng ka 4 bad 6 tarik u Nohprah.
Ka jingkem ïa ki briew ka la long ha Imphal West, Thoubal, Bishnupur, bad Kakching distrik, kaba pynpaw ïa ka jingtrei shitom jong ka jylla ban pynduh pyndam ïa ki kynhun kieng atiar bad kumjuh ki kynhun ba ju dawa pisa.
Ki shipai pahara ki la kem ïa uwei u briew uba ehrang jong ka kynhun synrop G5 jong ka PREPAK (PRO) uba la tip kyrteng kum u Irom Boyai Singh ba la tip ruh da ka kyrteng kum u Yaitanba (24) na Nagamapal Kangjabi Leirak ha Imphal West. U Singh u dei uba wan na Keibul Lamjao ha Bishnupur distrik.
Ha kawei pat ka jingkhynra ba kyrpang la ïoh ban kem ïa uwei u dkhot ka KYKL ba la tip kyrteng kum u Usham Tomba Singh bad kum u Heibra (24) na Kairembikhok Awang Leikai, Thoubal distrik, na ka thaiñ Saikon Labuk kaba hap hapoh jong ka Thoubal Police Station, la ïoh ban kurup noh na u ïa kawei ka mobile.
Kawei pat ka jingïoh kem kaba kongsan ka long haba ki shipai ki la ïoh ban kem ïa u dkhot ka RPF/PLA u Thokchom Angousana Singh ba la tip ruh da ka kyrteng kum u Santosh (52) na Heirok Part-II hajan ka khyrdop Heirok, Thoubal distrik. Ki bor pynïaid ki la ïoh kurup ïa kawei ka Mobile Phone bad kawei ka Sim Card na kti jong u.
Sa kawei pat ha Kakching distrik ki pulit ka Manipur ki la kem ïa u dkhot ka KCP (MFL) u Keisham Thamba Singh ba la tip ruh da ka kyrteng kum u Pritam (32 snem) na ka ïing sah jong u kaba don ha Sekmaijin Khoidum kaba hap hapoh Hiyanglam Police Station.
Ha Imphal West, uwei pat u nongbud ba kongsan jong ka UNLF (Koireng) u Hijam Marjit Singh ba la tip ruh da ka kyrteng kum u Dhamen (51) u la shah kem na Minuthong. Ki pulit ki la ïathuh ba u la don bynta konsan ha kaba pynmih ïa ki jinthoh dawa pisa bad ban dawa pisa na ki nongñiah trok ha shi lynter ka surok bah Imphal-Dimapur ha ka kyrteng jong ka kynhun seng G5, ha kane ka por la kurup ïa kawei ka mobile phone na u.
Ki bor pahara ki la ïoh ban kem ruh ïa u nongdawa pisa jong ka kynhun NLF (Koireng) u Soibam Basanta Singh ba la tip ruh da ka kyrteng kum u Samthaba (37 snem) na Laiphrakpam Mamang Leikai ha ka thaiñ Thoubal. U la treikam hapoh ka jingïada kaba kham heh jong ka G-5. La ïoh kurup ïa kawei ka mobile bad kawei ka sim card na u.
Ha kawei pat ka jingkhynra hapoh ka Yairipok Police Station, Thoubal distrik, la ïoh kem ïa arngut ki dkhot jong ka KCP (Apunba), u Konsam Anao Singh (26) bad u Khoirom Langamba Meitei (27), la ïoh kem ïa ki arngut ki dkhot jong ka KCP (Apunba).
Ki tiar ba la ïoh ban kurup ki kynthup ïa kawei ka SMG Carbine bad ar tylli ki jingthep kuli ba thylli, kawei ka mobile phone bad kawei ka kali arshaka.
Ki bor pahara ki la ïoh ban kem ruh ïa u nongbud ka PREPAK u Thokchom Sushilkumar ba la tip ruh kum u Amo (34 snem) na Bishnupur distrik kaba don ha Tera Urak Checking Point.
Nalor kata, ki pulit ka jylla Manipur ki la kem ruh ïa u shipai ka KCP (Apunba) u Sinam Deven Singh (25 snem) na Lamboikhongnangkhong, Imphal West bad ki la ïoh ban kurup ïa kawei ka mobile bad ar tylli ki sim card.
Shisngi shwa kane, ki pulit ki la ïoh ban kem ïa u dkhot ka KCP (Taibanganba) u Wangkhem Chinglen Singh (29 snem) na Kakching Lamkhai ha shilynter ka surok Indo-Burma Sugnu.
La kurup ïa kawei ka mobile handset bad kawei ka auto diesel.
Ki heh sorkar ki la ong ba kine ki jingkem ba bud ryntih ki pynpaw ïa ka buit kaba la pynkhlaiñ ban pynduh pyndam ïa ki kynhun dawa pisa, ban khanglad ïa ka jingdawa pisa jong ki lehnoh, bad ban pynduhjait ïa ki nongtreikam kiba treikam ha kylleng ki distrik jong ka jaka them.
Ka jingtohkit halor kawei pa kawei ka jingjia ka dang ïaid shakhmat.
