Shillong, Nohprah 07
Ka lympung ïalehkai SSA Champions Cup 2025 ka la jam sha ka semi final, hadien ba ka Langsning FC ka la lah ban pynliem noh ïa ka Mawkasiang da 6-0 kol ha ka Group-A bad ka Nongkseh ka la jop da 6-1 kol ïa ka Mawkriah West ha ka jingïakhun jong ka Group-B kaba la long ha ka sngi Saitjaiñ ha SSA Stadium, First Ground Polo.
Kane ka long ka jingjop kaba bun kol tam ïa ka Langsning FC, ka la biang pura ïa ka wat ba kan lah syndon ban bat ïa ka kyrdan kaba nyngkong na ka group da kaba kamai mar 10 poiñ bad ka MLP F.T, hynrei ka la tam lyngba ka jingïapher ha ka jingthep kol (+10 la +7).
Katba na ka liang ka Nongkseh ka la bat ia ka kyrdan ba nyngkong ka donkam haduh 9 kol, hynrei ha kaba kut ka la hap ba kan hun ka mynsiem ka jong ka ban neh noh ha ka kyrdan kaba ar ha ka Group-B, hadien ba ka Shillong Lajong FC ka la tam ha ka jingiapher jong ka jingthep kol (+16 la +13).
Kumta ha kaba kut jong ki jingiakhun jong ki group, ka jingpyniakap ia ka semi final ka long ba ka Langsning FC kan ïakhun pyrshah ïa ka Nongkseh SS&CC, katba ka Shillong Lajong FC ïa ka MLP. Kine ki jingïakhun kin long ha ka sngi Ba-ar bad sngi Balang ha ka por 4:30 janmiet.
Haba phai sha ki jingïakhun ka long ba Donlad Diengdoh u la khur ïa ka hat-trick hadien ba u la thep ha ka minit kaba 40, 64 & 82, ka ban ai mynsiem bha ïa u bad ïa ka kynhun jong ka Langsning ba kan khreh ïakhun ïa ka semifinal bad ïa ki kol kiba sah pat la thep da Samuel Phawa (55 & 60), hynrei ïa ka kol kaba nyngkong ïa ka Langsning la thep ia ka da u Nelson Rymbai (32).
Haba phai pat sha ka jingïakhun ka Nongkseh pyrshah ïa ka Mawkriah West, u Chesterpaul Lyngdoh u la lah ban lamkhmat da kaba thep ar kol (23 & 55), ïa kaba la bynrap lang da u Kitboklang Pale (25), Khrawkupar Jana (65), Kynsaibor Lhuid (68) bad u Baiaikara Swer (84). Katba ïa ka shi kol na ka Mawkriah West la thep da u Khaiñkupar Ïawphniaw (79).
Kumta wat lada dei tang ki kynhun ïalehkai ka SPL bad First Division kiba la rung sha ka semi final, hynrei ki kynhun ba dei na ka kyrdan ïakhun jong ka Second, Third bad Fourth Division, lah ban ong ba ki la lah ban ïa pyni ïa ka buit ïalehkai jong ki ha kane ka lympung, kaba khlem pep kiba bun hi na ki rangïalehai kiba la ïoh ban ïalehkai ha kane ka lympung, kan ïai neh sah junom la junom ha ka jingim ïalehkai jong ki.
