Shillong, Nohprah 07
Ka Dorbar Shnong Langkyrding Mihngi, Shillong kan pynlong ïa ka jingpynkhuid shnong ha ka 18 tarik mynta u bnai, kaba dei ka sngi Palei bad ha kane ka sngi kan don ka jingkhang shnong naduh ka por 8 baje mynstep haduh 12 baje mynsngi.
Ha ka kyrwoh khubor, u Rangbah Shnong ka DS Langkyrding Mihngi u Bah Rishanlang Syiemlieh u la ong ba la kyntu ïa ki dukan bad ki kali kamai kiba ha shnong ba kin sangeh treikam ha kitei ki por. Da kane la wer ruh ïa baroh ban ïamih paidbah bad shimkhia ban pynkhuid ïa la ki jong ki bynta jong ka shnong kumba la ju leh ha ki por pynkhuid shnong baroh.
Ka Dorbar Shnong ka ïawer kyrpang ruh ïa ki trai kiba bat jaka hapoh ka dorbar shnong bad ki bym pat shna ïing sah ba kin ïasnohkti lang ha kane ka jingpynkhuid shnong.
Ha kawei pat ka khubor, ka Dorbar Shnong Jaiaw Laitdom kan pynlong ïa ka jingpynkhuid shnong kaba shisien shi snem ha ka 13 tarik mynta u bnai naduh ka por 8 baje mynstep.
Ka Dorbar Shnong ka kyrpad ïa ki nongshong shnong baroh ban ïa mih ryntih ban pynkhuid ïa ka shnong ka thaw haduh ban da dep pynkhuid. Ha kajuh ka por la kyrpad ïa ki nongleit nongwan bad ki nongñiah kali ba kin ïai shah bad ïatreilang bad ka Dorbar Shnong.
Kumjuh ruh na ka liang jong ka Dorbar Shnong Nongmensong ka la pyntip ba kan pynlong ïa ka jingpynkhuid shnong ha ka 12/12/2025 naduh ka por 8 baje mynstep. Kumta la kyntu ïa baroh ki paid nongshong shnong ba kin ïa mih ryntih ha katei ka sngi.
Ha kajuh ka por ka Dorbar Shnong ka buh ruh ka jingkyrpad sha baroh ki nongleit nongwan ba ïaid lyngba ka Nongmensong ba kin long kiba adkar haba ñiah ïa la ki kali ha ki surok shnong naduh ka por 8 baje mynstep haduh 2 baje nohphai sngi khnang ba kan ym wanrah ka jingthut lane ka jingmynsaw ïa ki paidbah kiba ïashim bynta ha ka jingpynkhuid shnong.
La kyntu ruh ïa ki trai jaka bad ki ïing kiba nabar shnong bad kiba don jaka lane ïing ha Nongmensong ba kin ïashim bynta lang ha kane ka sngi.
Ka Dorbar Shnong Lumshyiap, Shillong-1 kan pynlong ïa ka jingpynkhuid shnong ha ka 15 tarik Nohprah, 2025 naduh ka por 8:00 baje mynstep haduh ban da dep. Da kane la pyntip ruh sha baroh ki trai jaka ki bym shong bym sah hapoh ka shnong bad kiba don jaka hapoh u pud u sam jong ka Dorbar Shnong Lumshyiap, Shillong-1 ba kin wan mih shapoh ka ophis jong ka Dorbar Shnong Lumshyiap shuwa lane ha ka 15 tarik Nohprah, 2025. Namar kata, la pyntip ruh sha baroh ki trai jaka ki bym wan mih ha shuwa lane ka tarik ba la buh, ka shnong kan ym shim jingkitkhlieh lada don eiei ha kaba iadei bad ka jaka jong ki. la ki jingtip ba kham bniah phi lah ban telephone ha kine ki number harum: 9856926799 – Rangbah Shnong bad 9402140726 – Secretary Shnong.
