Amlarem, Nohprah 07
Ka ophis u Sub-Divisional Public Relations Officer, Amlarem Civil Sub-Division, West Jaiñtia Hills, lyngba u kyrwoh ba la pyllait ha ka 6 tarik Nohprah ka pyntip sha ki paidbah, ki nongwan shangkai, ki nongpynïaid kali bad kiwei pat ba la khang ïa ka leit ka wan jong ki kali heh bad ki bos lyngba ka surok Amlarem-Padu-Nongbareh na ka shnong Khonglah shaduh ka shnong Nongbareh namar ka jingpyntrei ïa ki jingkieng ka dang ïaid shakhmat.
Kine ki saw tylli ki jingkieng RCC kiba dang pyntrei mynta ha shilynter ka surok Amlarem-Padu-Nongbareh ki kynthup ïa ka jingkieng RCC ha ka shnong Khonglah kaba jngai 16.30 Km. Ka jingkieng RCC ha ka shnong Khonglah kaba jngai 16.670 Km. Ka jingkieng RCC ha ka shnong Khonglah kaba jngai 16.960 Km bad ka jingkieng RCC kaba 20.85 Km ha ka shnong Nongbareh.
Kane ka jingpyntrei kaba dang ïaid shakhmat, ka la pynduna shibun halor ka jinglah ban ïaid lyngba kane ka surok, khamtam ki kali heh. La ïoh jingtip ruh ba ka kynhun ki nongwan shangkai kiba wan da ka bos ban leit jngoh sha ka shnong Amloi ki la sahkut ha ka shnong Khonglah namar ka jingkhang ïa ka leit ka wan jong ki kali heh.
Kumta khnang ban lait na kino kino ki jingeh kiba lah ban kham ktah jur la ai jingmut ïa ki nongwan shangkai, ki nongleit nongwan bad ïa ki paidbah ba kin pyndonkam da ki kali rit haba ki thmu ban leit jngoh ïa ki shnong kiba don ha lynti jong kane ka surok tad haduh ban da pynbna da kumwei pat.
