Shillong, Nohprah 07
Ka tamasa Sohphlang kaba la pynlong da ka Mawkynrew Sohphlang Eco-Cultural Indeginous Society ha Lad Kharang ka la long kaba jop bad kut noh ha ka 6 tarik da ka jingphuh jingphing.
Ha kane ka sngi ki samla ki longkmie longkpa ki hep kiba rit ki la wan ban ïashim bynta da ka jingkmen bad ka long ruh ka sngi ban sah kynmaw na ka bynta jong ki.
Ka tamasa Sohphlang ka la nang kiew shuh-shuh katba dang mih ki snem. Na ka jingsdang kaba rit mynta ka la kiew shaphrang ha bun ki bynta. Ka dei ruh ka tamasa kaba khring ïa ki nongwan jngohkai ym tang na ka Jylla hynrei na kiwei ki Jylla ruh kumjuh.
Ha kane ka tamasa ki paidbah nongrep ki la wan ban ïa shim bynta lang ban die ïa ki mar rep jong ki khlem da don kam ban siew sha ka society. Kane ka dei ka kabu kaba khraw na ka bynta ki nongrep.
Haba kren ha kane ka sngi u nongaibuit ka society u Bah Carmel Lyngdoh u la pynpaw ïa ka jingsngewnguh ïa ka Sorkar kaba la ïarap bad kyrshan ïa ka society ban pynlong ïa kane ka tamasa.
U la ong ruh ba ka society kan bteng ban pynlong ïa kane ka tamasa ha ki snem ban sa dang wan bad kan dang ïaleh ban kham pynbha shuh-shuh khang ba ki paidbah kin dang ïai wan ban ïashimbynta ha kane ka tamasa bad kan long ka jingmyntoi ïa ki paidbah jong ka dong ka thaiñ baroh kawei.
