Tura, Nohprah 07
Ka tamasa ‘Me’gong’ mynta u snem ka la kut noh ha ryngkat ka jing-i-phuh i-phieng ba i-shongkun ha Ri-lum Garo, kaba la khring ïa ki hajar ngut ki nongwan jngohkai ha kine ki ar sngi ba la dep bad pynskhem ruh ïa ka Meghalaya kum kawei na ki jaka bariewspah tam ha ka liang ka kolshor ha India.
Lem bad ki nongrwai bad nongput-nongtem ba paw jong ka pyrthei, kumjuh kito kiba na ka ri bad ki ‘riewdon sap ba shitrhem napoh ka thaiñ lajong kiba ïasam lang ïa ka rynsan, ka tamasa ka la long kum kawei na ki rynsan pyninam ban sah kynmaw jong ka thaiñ ha ka liang ka rwai ka siaw, ka kolshor bad ka mynsiem ka jingïadon bynta lang jong ka imlang-sahlang.
Ha kane ka tamasa la wan ban ïashim bynta da palat 55,000 ngut ki paidbah na kane ka thaiñ bad nabar kumjuh.
Ka sngi kaba ar ka la wanrah ïa ka jingkut kaba i-shongkun ha kaba ka kynhun rwai ‘Blue’ ba pawnam ka ri Bilat, ka ‘Yellow Claw’, u nongrwai bad nongthoh jingrwai – Prateek Kuhad, bad ka nongrwai ba paw ka Bollywood – Kanika Kapoor, ki la sei madan la ki sap ki phong ha ka ‘Aski Stage’ sha ki paidbah byllien kiba la rwai bad risa lang ïa ki jingrwai jong ki.
U Antony Costa na ka kynhun ‘Blue’, u la ong, “Ka tamasa Megong ha Ri-lum Garo ka long kaba pynïap biej shisha! Ki paidbah ki la shit rhem puk.”
Ki nongrwai ka kynhun ‘Blue’ – Simon Webbe, Antony Costa, Lee Ryan bad u Duncan James ki la ai khublei ïa ki nongwan sha kane ka tamasa da kaba ong, “Ka jingwan jong ki briew sha kane ka tamasa ka long kaba khraw shisha; khublei ïa phi baroh; kawei ka jingieid sha phi baroh! Ka Ri-lum Garo ka long kaba itynnad shisha: ka ‘paradise’; ka jingbha; khublei shibun.”
Kawei-pa-kawei ka jingïashim bynta ka long kaba kyrpang, kaba sdang naduh ki jingrwai ba paw jong ka Kanika Kapoor kum ka ‘Chittiyaan Kalaiyan’, ‘Baby Doll’, ‘Jawaani Le Doobi’ bad kiwei-kiwei ki jingrwai ba paw jong ka Bollywood.
Ka la pynpaw ïa ka jingkmen jong ka ban rwai ha Meghalaya ha ka sien kaba ar bad ka la ïaroh ïa ki nongwan tamasa ba ki long kiwei na ki nongpeitkai kiba bha tam kiba ka la ïoh pdiang.
Ka jinsdang jong ka janmiet ka la bud sa da ki sur bathiang jong u Prateek Kuhad.
Hadien kane, bud sa ki jingrwai ba sngewtynnad na ka kynhun ‘Blue’ kiba ki paidbah da ki hajar ngut ki la kynud sur lang ïa ki jingrwai jong ki ba kynthup ïa ka ‘One Love’, ‘All Rise’, ‘Guilty’, ‘One Last Time’, bad kiwei-kiwei.
Nadien nangne, bud sa ki jingtem ‘EDM’ jong ka ‘Yellow Claw’, kaba la pynkylla ïa ka madan jong ka tamasa sha ka duriaw jong ki jingshai ba thaba bad ki nongkyrshan kiba la ïa risa, ha baroh kawei ka Madan Bolbokgre-Watregre ba la pynlong ïa ka tamasa.
Hashuwa, katei ka janmiet ka la wanrah ruh ïa ki jingrwai kiba ki paidbah ki sngewtynnad kum ka ‘Hoi Hoi Makbil’, ‘G-Hills Finest’, ‘Crack Gang’, ‘Rough Road’ bad ‘Nokpante’ sha ka ‘Kingfisher Stage’, kaba la khring ïa ki hajar ngut ki paidbah.
Ha ka sngi nyngkong, ki paidbah nongwan peit kai ki la sakhi ïa u nongrwai ba pawnam ka Amerika, u Richard Marx, ka Neeti Mohan, Julian Marley bad u Nucleya. U Marx u la rwai ïa ki jingrwai barim bad ki jingrwai bym pat pynmih na ka thup jingrwai ban wan jong u kaba la tip kum ka ‘Afterhours’.
Ki jingrwai ba paw jong ka Neeti Mohan ha Bollywood ki la khring ïa ki paidbah ba bun, bad ka jingrwai pynkhih mynsiem jong ka ïa ka ‘Mayabini’, kum ka jingkynmaw burom ïa u Zubeen Garg ha ka jaka ba la kha ïa u ha Tura, ka la long kawei na ki bynta ba la ïasam bad ïakren bha jong kane ka tamasa.
Ka jingrwai ‘Reggae’ jong u Julian Marley bad ka jingpynkut na u Nucleya ka la ïalam sha ka jingkut noh jong ka sngi ka banyngkong.
Nalor ki jingrwai, ki la don ruh kiwei pat kiba ka tamasa ka la khring bha ïa kiba bun ki paidbah ha kine ki 2 sngi.
Ka ‘Great Garo Hills Cook Off’ ka la sakhi ïa ka jingïashim bynta jong kiba bun ban pynkhreh ïa ki jingbam tynrai, ha kaba ka Nambie Jessica Marak, ‘Runner-up’ ka ‘Master Chef India Season 8’ ka la ïadonlang kum ka nongbishar ba kyrpang, ka jingïakop ‘Miss & Mr. Me’gong’ bad kiwei-kiwei.
Ha ka sngi plie jong ka tamasa la ïadonlang u Conrad K. Sangma, Myntri Rangbah ka Jylla, kaba ka jingïohi jngai jong u suki-suki ka pynskhem ïa ka kyrdan jong ka Meghalaya kum ka jaka ba kongsan jong ka put ka tem na ka bynta ka ïoh ka kot jong ka India. Ki nongrwai bad nongput-nongtem na kylleng ka pyrthei mynta ki jied bad kynthup lang ïa ka Jylla haba ki wan ban ïashim bynta sha India na bynta ka ‘Tour’ jong ki.
