Shillong, Nohprah 07
Kum ka dak ka jingkynmaw burom ïa ka lyngkhuh sngi ïap ba 31 jong u Bah Bull Nangjop Lyngdoh, ka Khasi Student Union (KSU) ha ka 7 tarik Nohprah 2025 ka sngi U Blei ka la pynlong ïa ka jingleit buh syntiew ha u motdur jong u Bah Bull, u ba don ha Malki, Shillong.
Ka jingrakhe ka KSU ïa kane ka sngi ka long ban kynmaw burom ïa ki kam, ki jinglen lade ka mynsiem ïaishah jong u Bah Bull, u la long u President barim ka seng ha ki snem 1983 haduh 1990.
Ha kane ka jingïalang, la pynlong ka jingsngap ba shi minit kum ka dak ka jingburom ïa une u nongïalam ba satar ka KSU bud sa ka jingbuh syntiew na ki nongïalam ka Central Executive Council (CEC ) bad kiwei kiwei de ki nongialam jong ki Circle bad Unit.
Ka para jong u Bah Bull ka kong Hana Lyngdoh ka la wan ban ïashimbynta ha ryngkat ki khunruid, ki khunksiew bad kiba ha ïing ha sem.
Haba kren ha ka jingïalang u Bah Lambokstarwell Marngar u la ong, ka la dei ka kamram jong uwei pa uwei u dkhot ka jaitbyndriew ban shim jingkitkhlieh na ka bynta ban ïada ïa ka jaidbynriew bad ïa ki trai ri trai muluk.
Shuh-shuh u Bah Lambok u la ong, kum ki nongïalam bad ki dkhot jong ka seng baroh ki ïakynduh ïa ka jingshah kynthoh kumba u Bah Bull Nongjop Lyngdoh (bam kwai ha dwar u Blei) u ïakynduh ha ka por jong u, hynrei ym dei ban pynsngap ïa kiba kum kita, ka kam jong ki dkhot ki dei ban aiti met bad mynsiem ban ïakren ban ïai ïaleh na ka bynta ka jingshong shngaiñ jong ka ri bad ka jaitbyndriew baroh kawei.
“Ha ka por ba u Bah Bull u shem ïa ka lynti ban ïakhun pyrshah, la thep mukotduma bapher-bapher la kum ïa ki kynhun lehnoh bad la shem ruh ba ki ong ba ki leh ïa ki kam be-aiñ.” La ong u Bah Lambok.
U Bah Lambok u la ong ruh ba, ki kam ba ka KSU ka la leh ki lah ban long ki kam be-aiñ ha khmat ka Sorkar, hynrei na ka bynta ka jaitbyndriew pat ka dei ka aiñ ban shngaiñ ka pateng ka ban sa wan. Nalor kata u la ong, ba lyngba kane ka sngi, kum ki nongïalam ka seng ka long kaba donkam ban pynthikna ïalade ban pynkhlaiñ ïa ki bor pyrkhat pyrdaiñ, ba ym dei ban shah ïalam bakla, hynrei ban ïai-bteng ïa ka lynti ïaid walta ka jlan, kaba kongsan ka long ban ïai-neh khnang ba ka jaitbynriew kan shngaiñ.
U Bah Lambok u la kyntu ïa ki nongïalam bad ki dkhot ka KSU ba kin long ka aiñ bad ki khyrdop jong ka jaitbyndriew bad ban sopspaiñ ïa kita ki dak mong jong ka jaitbyndriew khang ban lah ban tehsong kumba long kiwei ki jaitbyndriew khnang ban im ka pateng bad ka lawei jong ka Ri.
