Shillong, Nohprah 07
Ka Meghalaya Judo Association (MJA) ka la pynkup burom ïa ki ar ngut ki nongïalehkai kiba la wanrah burom ïa ka Jylla da kaba khur takma ha ka Sub-Junior National Judo Championships 2025 kaba la kut dangshen ha Hyderabad.
Kine ki long u u Adric Lyngdoh Nonglait na East Khasi Hills uba la khur ïa ka takma rupa ha ka kyrdan ïalehkai jong kiba hapoh 66kg bad ka Larika Kharkylliang na Eastern West Khasi Hills kaba la khur ïa ka takma rnong ha ka kyrdan ïalehkai jong kiba hapoh 48kg.
Ïa kane ka jingpynkup burom la pynlong ha ka 4 tarik mynta u bnai ha Hotel Pegasus Crown, Shillong bad kane ka synjuk ka la leh burom lang ïa u Jonathan Larinsanga, Coach-cum-Manager uba la synran lang ïa ka kynhun ïalehka ka Jylla sha katei ka lympung kaba la long naduh 16 haduh 20 tarik u Naiwieng mynta u snem.
Kat kum ka kyrwoh la ong ba katei ka synjuk ka la aiti da ki song pisa sha kitei ki ar ngut ki khynnah bad ka jingai kaba kyrpang ïa u Larinsanga halor katei ka jingjop.
Ha katei ka jingïalang la ïadon lang u Bah John Lyngdoh, Working President, kumjuh u Dipak Mallick, General Secretary; u Sujit Kumar Chanda, Joint Secretary lem bad kiwei ki dkhot.
Haba ai jingkren ha katei ka sngi, u Bah John Lyngdoh u la pynpaw ba kane ka long ka jingsarong ïa ka Meghalaya Judo Association bad ïa ka Jylla hi baroh kawei. U la pynpaw ba na ki 8 ngut ki nongïalehkai kiba la leit shim bynta, arngut ki nongïalehkai ki la khur takma, kaba la wanrah ïa ka jingsarong ïa ka Jylla bad kane ka long shi bynta ban pynkhreh ïa ka 39th National Games 2027.
