Shillong, Nohprah 07
Ka Hynñiewtrep Youth Council (HYC) Sengkmie ha ka 7 tarik u Nohprah 2025, ka la rakhe kynmaw burom ïa ka lyngkhuh sngi ïap ba 31 jong u Bah (L) Bull N Lyngdoh ha u mot sah nam jong ka seng, uba don ha Motphran.
Ha kane ka sngi la don ryngkat lang baroh ki nongïalam ka HYC Sengkmie kiba kynthup ïa u Bah Enlang Sawian, Education Secretary, Bah Issac Basaiawmoit Secretary, Bah Purningstar Shabong Socio-Cultural Secreatary ha ryngkat bad kiwei kiwei ki nongïalam bad ki dkhot jong ka seng na ki circle, unit ka Shillong city , bad kumjuh ki paidbah kiba la wan ban sakhi.
Ha kane ka jingïalang kynmaw burom ïa u Bah (L) Bull N Lyngdoh la ïoh ruh ka jingkren na u Bah Enlang Sawian, uba la kynmaw ïa ki kam kiba radbah kiba u samla rangbah Bah Bull Lyngdoh u la leh bad synñiang sha ka Jaidbynriew, kiba long pat ki matti kiba kum ka pateng ba mynta bad ka pateng ba sa wan ki dei ban bud bad pynyllun.
U Bah Enlang Sawian u la banjur ruh da kaba ong ba ha kum kane ka sngi kum ka jaidbynriew ngi dei ban sngewthuh ba ka jingma pyrshah ïa ka jaidbynriew kam dei tang na ka jingwan rung kyrthep ki bar jylla bad ki mynder ri, hynrei kum ka jaidbynriew ka dei ban sngewthuh ba ka jingma ka dei ruh ka thma ba jar-jar ïa ki khun samla ka jaidbynriew lyngba u jingdih pynbuaid u drok.
Nalor kata, u la kynthoh ruh ïa ka Sorkar India kaba la pyrshang ban thombor bad ïuhroit ïa ka hok ba kyrpang jong ka jaidbynriew, da kaba pyrshang ban wanrah ïa ki kyndon aiñ bapher bapher, kum ka jingpynmih lyngba ka Office Memorandum jong ka Ministry of Forest, Environment and Climate Change kaba ong “Ym donkam shuh ïa ka jingsngap paidbah lada donkam ban tih ïa ki mar poh khyndew kiba kynthup ïa u Uranium”.
“Ngi sngewthuh ba kane ka dei ka buit ba shyrkhei jong ka Sorkar India ban ïoh khlong ïa u Uranium napoh ka Jylla Meghalaya,” la ong u Bah Enlang Sawian.
Shuh shuh u Bah Enlang u la kynthoh ruh ïa ka Sorkar MDA hapoh ka jingïalam ka NPP kaba pyrshang ban leh klet ïa ki mat jingdawa kiba kynthup ïa ka ILP mynta la 7 snem kynthih da kaba kynnoh bad khynniat beit tang ïa ka Sorkar India. “Kane ka pyni ba ka Sorkar Meghalaya kam don satia ïa kano kano ka bor ban pynbor ïa ka Sorkar India ban pyntreikam ïa ka ILP ha ka Jylla wat lada ki ïatrei lang bad ka BJP,” u la bynrap.
