Khliehriat, Nohprah 07
Ka Rymbai Shkenshynriah ka la rah ïa ka nam lahduh jong ka lympung ïalehkai Super Division Football Tournament kaba tip kum ka ‘5th Kyrmen Shylla Contribution Trophy’ ba la pynïaid da ka East Jaintia Hills District Football Association (EJHDFA).
Kane ka la wan hadien ba ka Rymbai Shkenshynriah ka la pynliem noh ïa ka Sutnga SSCC da 3-1 kol ha ka penalty shootout ha ka jingïakhun phainal kaba la long ha madan artificial turf Diengshynrum, Khliehriat ha ka 06 tarik Nohprah.
Ka jingïakhun haduh kaba kut jong ka por ba la buh hapdeng kine ki arliang mamla ka la ïakhaid da mar 1-1 kol bad ym shym la don ba pynkhih jar satia ha ka extra time kaba la pynbor ban jam sha ka jingiashut tie breaker ne ka penalty shootout.
Haba phai sha ka jingïalehkai, ka Rymbai Shkenshynriah kala ïoh da ka Own Goal (OG) ba la thep da u Deligent Pdang ha ka minit kaba 43, katba Sutnga SSCC ka la pynïakhaid ïa ka jingïakhun ha ki minit pynjlan jong ka por shuwa ban kut kata 90+3 ba la thep da u Coming Dkhar.
Ka lahduh ka Rymbai Shkenshynriah ka la ïoh pdiang ïa ka khusnam pisa kaba T.12,0000/- ryngkat ka trophy, katba ka Sutnga SSCC kala ïoh pdiang ïa ka khusnam pisa kaba T.80,000/- kum ka kynhun kaba wan ba ar.
La sam ruh ïa ki khunsnam shimet sha ki rangïalehkai ba kynsai, ha kaba u Skillfull Tariang jong ka Rymbai Shkenshynriah u la khur ïa ka nam ‘Player of the Match’, u Amorrous Lyngdoh na Sutnga SSCC ula khur ïa ka nam ‘Player of the Tournament’, u Ribiang Dkhar uba la thep 9 kol jong ka Rymbai Shkenshynriah ula khur ïa ka nam ‘Top Scorer’, katba u Yoomeki Dkhar jong ka Shilliang Umshong ula khur ïa ka nam Goalkeeper of the Tournament.
La sam ruh ïa ka khusnam Best Team ba la ïohrah da ka Shilliang Umshong SC.
Ha kane ka jingïakhun phainal la donlang ruh u Myntri ka tnat kam ïalehkai ka sorkar Jylla bad MLA ka Jowai Ma Wailadmiki Shylla kumjuh u MLA ka Khliehriat Ma Kyrmen Shylla nalor ki MDC ka JHADC, ki nongïalam bad dkhot nongkitkam ka EJHDFA ba kynthup ïa u Working president Ma Mehiwot Chadap, General Secretary Ma James Sutnga nalor ki paidbah nongkyrshan jong ki ar kynhun.
