Shillong, Nohprah 07
Ki lai ngut ki nonglehkai phutbol kynthei ka Meghalaya ka Eiladki Ksoo, ka Ibashembha Khongsit bad ka Ibadarihun Nongsiej, ki la shah khot sngewbha ban leit sha ka jingshah pyntbit na ka bynta ka kynhun ïalehkai jong ki kynthei U-17 jong ka Ri India, kaban sa long ha Bangalore.
Ïa kine ki lai ngut la jied katkum ka jinglah ban ïalehkai bha ha ka Meghalaya Women’s State League kaba dang shu kut shen. Ka Eiladki bad ka Ibadarihun baroh arngut ki la mihkhmat ïa ka Laitkor, katba ka Ibashembha pat ka la ïalehkai na ka bynta ka Mawlum Tyrsad.
“Kane ka jingjop ka kren ïa ka jingaiti lut jong ki bad ïa ka jingtbit jong ka jingïalehkai phutbol jong ki kynthei kaba nang kiew ha ka Jylla jong ngi,” la ong u President ka Meghalaya Football Association u Bah Hamletson Dohling. “Ka long kaba ai mynsiem ban ïohi ïa ki nongïalehkai samla ba ki ïaid shakhmat bad shim ïa ka jaka jong ki ha ki madan kiba kham heh.”
U la bynrap ban ai jingmut ban ïakynduh ïa ki jingeh da ka jingshaniah, ka jingsngewrit bad ka jingkwah ban nang. “La ka long kumno-kumno ruh ka jingmih, kane ka kabu ka long kaba dei hok ban ïoh. Ngi kitbok kitrwiang ïa ki baroh,” la bynrap biang u Bah Hamletson Dohling.
