Shillong, Nohprah 07
Ka Meghalaya Commercial Truck Owners Drivers Association (MCTODA) ka la ai por shi taiew ïa ka Sorkar ba kan pynmih noh ïa ka jingpynbna paidbah ne ka ‘notification’ ba ki kompeni pynmih dewbilat kin hap siew noh khyndai tyngkai ka bai kit dewbilat.
Haba ïakren bad u Bah Moslander Marngar uba dei u Chairman ka MCTODA u la ïathuh ba ha ka jingïalang kaba la long ha ka 6 tarik Nohprah ha madan phutbol Mawryngkneng, ki la shim ïa ka rai ban phah shithi sha u Symbud Myntri Rangbah ka jylla u Bah Sniawbhalang Dhar uba bat ïa ka tnad Transport ba un phah pynmih noh ïa ka jingpynbna ba ki kompeni pynmih dewbilat kin siew noh ïa ka dor khyndai tyngka ka bai kit dewbilat.
U la ïathuh ba ïa kane ka shithi, ka MCTODA kan sa phah lashai ka sngi Nyngkong sha u Bah Sniawbhalang.
Shuh shuh u la ïathuh ba ka kynhun ka la ai por ïa ka Sorkar ba kan pynmih ïa ka notification hapoh shi taiew.
U la ong ba ha ka jingïalang la ïatai sani bha namar ki kompeni pynmih dewbilat kim pat treh ban siew ïa ka dor khyndai tyngka ïa ka bai kit dewbilat namar ki ap ïa ka jingpynbna na ka Sorkar.
U la pyntip ba ki kompeni kin sa siew ïa ka dor khyndai tyngka tad ynda ka Sorkar ka la pynmih ïa ka notification.
Shuh shuh u la ong biang ba lada ka Sorkar kam lah ban pynmih ïa ka notification, ka kynhun kan mih beit sha surok ban pynlong jingïakhih.
