Shillong, Nohprah 08
U Gaurav Narleng u la lah ban kamai ïa ka span ron kaba ar (second century) kaba la biang pura ïa ka kynhun ïalehkai ka Meghalaya ba kan kamai haduh 312 ron ha ka jingïakhun pyrshah ïa ka Nagaland jong ka lympung U-19 Men’s Cooch Behar Trophy 2025-26 plate group, kaba la sdang naduh ka lah sngi u Blei ha madan ïalehkai ka MCA, Polo.
Haduh ba kut jong ka sngi, ka Nagaland kaba la wan ba kan sdang ïa ka pali tied jong ka, ka la lah ban kamai 20 ron bad shah pynhap ar wiket bad ba dang shah tam da kumba 292 ron.
Ha kane ka jingïakhun, u Narleng u la lah ban kamai 127 ron kaba la wan tang na ki 129 tylli ki bol, kaba la wan hadien ba ka Nagaland hadien ba ka la jop ïa ka jingkynting pisa (toss), pynban ka la ailad shwa ïa ka Meghalaya ba kan tied nyngkong, kaba shipor, kane ka rai la i kumba ka la treikam ïa ka Nagaland, hadien ba ka la lah ban pynhap lai tylli ki wiket ka Meghalaya hadien ba ka la lah ba kan kamai 20 ron bad 73 ron na ka bynta 4 wiket.
Hadien kane, u Narleng u la dei ka pali ka jong u ban wan shapdeng ka madan ïakhun ryngkat bad u Angkit Tamang, ha kaba kine ki arngut ki la dem hi khui bad tad haduh ba ka jingïakhun kan leit sha ka jingshongthait shipor, ka Meghalaya ka la lah ban kamai 150 ron. Hadien ba u Narleng u la shah pynkhyllem noh, u Angkit u ïai bteng ban shim ïa ka bynta kum u nongïada ïa ka jong ka kynhun bad ban ai ïa ka jingkyrshan ïa u Rudra Singh Rathor uba la bteng ban kamai haduh 58 ron, katba u Angkit u la lah ban kamai 52 ron na ki 103 tylli ki bol.
Ha kane ka jingïakhun, ki rangïalehkai ka Nagaland, kin diaw bha ka mynsiem hadien ba ki la pynlehnoh ei ïa ki kabu ksiar, hadien ba ki la pynhap sharud ïa kiba bun tylli ki bol ba ki la dei ban kem suk ïa ki bad kumjuh ka ‘fielding’ jong ki hapdeng madan, kine kiei kiei baroh, ki la ïarap pat ïa ka Meghalaya ba kan kamai palat ïa ka lai spah ron.
Watla katta u Medempok Pongeng u long u nongkawang bol ba paw ka Nagaland hadien ba u la ïoh ban khur 3/46.
Ka Nagaland ka la ïoh por kumba shi kynta tam ban sdang ïa la ka pali wan tied jong ka, kaba mar sien ïasdang, ka la hap kynsan artylli ki wiket kiba kynthup ïa u Jesevilie Dzeyie uba la shah pynkhyllem noh ha u Narleng bad u Tachuye Trakha ha u Mewankitbok Kharpuri.
Kumta ka jingsdang kaba kum kane, ka long kaba ai mynsiem ïa ki rangïalehkai ka Meghalaya na ka bynta ban phai pat sha ka sngi kaba ar jong kane ka jingïakhun, ha kaba ki nongkawang bol jong ka, kin hap ban kham trei shitom na ka bynta ban lah ban pynhap kham kloi ïa baroh ki wiket ba sah jong ka Nagaland.
