Jowai, Nohprah 08
Ka Jaiñtia National Council (JNC) ka la pynbna ban pynlong da ka jingïakhih paidbah ha ka 10 tarik Nohprah hakhmat ka ophis u Deputy Commissioner, Khliehriat, East Jaiñtia Hills ban pynpaw pyrshah ïa ka jingthmu seng ïa ka karkhana Shree Cement Integrated Cement Plant ha ka shnong Daistong, East Jaiñtia Hills, da kaba kdew ba ka Sorkar kam shym la leh eiei halor ka jingkynnoh die jaka beaiñ nalor ka jingsngewkhia halor ka jingktah ïa ka mariang.
Ïa kane ka rai la shim ha ka Central Executive Committee (CEC) jong ka Council kaba la long ha ka 8 tarik Nohprah.
Ha ka jingkren lyngba ka video, u President ka JNC u Bah Sambormi Lyngdoh u la ong, “Ngi la poi sha kawei ka rai kaba shai bha, kumba ngi la maham naduh kham hashwa, lada kam don kano-kano ka jubab na ka liang ka Sorkar hadien ba ngi la phah ïa ka jingujor, ngin ym shong kli kti.”
Ka JNC ka la kdew ba ka la phah bun tylli ki jingujor sha ki ophis Sorkar bapher-bapher, kynthup sha u Deputy Commissioner ka East Jaiñtia Hills bad sha u Chief Executive Member (CEM) ka JHADC, hynrei kam shym la don kano-kano ka jingai jubab.
“Ngi kyntu ïa ki nongshong shnong jong ki thaiñ kiba don ka jingsngewkhia bad khamtam ki nongshong shnong jong ka shnong Daistong bad ki shnong ba marjan ki ban shah ktah ha kane ka jingtyrwa ban seng ïa ka karkhana dewbilat Shree Cement ba kim dei ban tieng ban smiej namar ka JNC ka don ryngkat bad phi. Wan ban pynïasoh lang sha kane ka jingïakhih ha ka 10 tarik Nohprah,” kyntu u President ka seng.
Kane ka jingïakhih paidbah hakhmat ka ophis u Deputy Commissioner, Khliehriat kan kynthup da ka jingrah ïa ki plakad, ki jingkren bad ka jingïalum jong ki paidbah nongkyrshan.
“Ngi kyntu ruh ïa ki paidbah na kylleng ka East Jaiñtia Hills ba kin kiar na kaba kynnoh ïa kiwei lane ban pynpaw ka jingsngewkhia tang ha ki rynsan social media. Pynpaw ïa ka jingieit jong phi na ka bynta la ka jong ka khyndew ka shyiap ym tang ha ki online hynrei mih shakhmat ban ai jingkyrshan ïa kane ka mat kaba kongsan kaba ktah jur ïa ka imlang ka sahlang jong ngi, ïa ka khyndew ka shyiap bad ïa ka lawei ka jong ngi,” ong u Bah Sambormi.
