Shillong, Nohprah 08
Ka FC Goa ka la long ka lahduh jong ka AIFF Super Cup ha ka sien kaba lai hadien ba ka la lah ban pynliem noh ïa ka East Bengal FC lyngba ka tie-breaker da 6-5 kol ha ka miet jong ka sngi U Blei ha PJN Stadium ha Fatorda.
Ha kane ka jingïakhun baroh arliang ki la pyrshang ban ïakhun tyngeh na ka bynta ban ïoh thep kol, hynrei kim shym la lah ban pynurlong wat hadien ba la pynïakhun biang sa ïa ka extra time. Kane ka jingbym lah ban thep kol ka la pynlong ïa ki bor pynïaid ban pynïashut noh da ka tie-breaker kaba long ka sien kaba nyngkong eh ha ka final jong ka AIFF Super Cup.
U kapten jong ka FC Goa u Borja Herrera bad u Mohamad Basim Rashid jong ka East Bengal ki la long ki ar ngut kiba la pynlehnohei ha ka jingshut ïa ka tie-breaker napdeng ki 10 ngut. Katba u Kevin Sibille, u kapten u Saul Crespo, Miguel Ferreira bad u Anwar Ali ki la lah ban thep kol na ka bynta ka East Bengal, katba u Javier Siverio, Dejan Drazic, Muhammed Nemil bad u David Timor ki la lah ban thep kol na ka bynta ka FC Goa, kaba la pynlong ïa ki ban poi sha ka ‘sudden death’. Te kumta u Udanta Singh Kumam bad u Sahil Tavora ki la thep kol na ka bynta ka Goa, katba u Hamid Ahadad u la lah ban thep na ka bynta ka East Bengal, hynrei u PV Vishnu um shym la lah ban thep.
Ha kane ka jingïakhun phainal jong ka AIFF Super Cup 2025-26 ka la long kaba itynnad bad kaba ïakhaid bha. Ka FC Goa ka la pyrshang ban ïakhun tyngeh bha hadien ba ka la ïoh jingkyrshan na ki paidbah, hynrei ka East Bengal ka la ïashan tyngeh ban pyllait na ka jingshah thep.
Ka East Bengal ka la ïoh ïa ka kabu kaba biang, hynrei kam shym la lah ban pynurlong. Kane ka kabu ksiar ka la wan nyngkong ha ka minit kaba 12, ha kaba u Miguel u la ïoh ban rah ïa ka bol na ka bynta ban pynpaw ïa ki rangïalehkai ‘dien ka liang pyrshah bad kumjuh ïa u rangapkol, u Prabhsukhan Singh Gill, hynrei u la shut pynban shabar. Kumjuh u Bipin Singh u la ïakhun tyngeh ha ka bynta kaba shapdeng, hynrei um shym la lah ban pynpaw ïa ki rangïalehkai ‘dien ka FC Goa.
Haduh kaba kut kine ki kynhun kim shym la lah ban pynurlong watla ki la ïoh ïa katto katne ki kabu ksiar ban thep kol.
