Shillong, Nohprah 08
Uwei u nongtrei mon sngewbha ha ka imlang-sahlang u la dawa weng kam ïa u Headmaster jong ka Mon Rongsna Government Lower Primary School ha South Garo Hills, halor ka jingkynnoh bym shim-khia ïa ki kamram jong u naduh u snem 2015 kaba la ïalam pat sha ka jingpep skul ba shiteng por jong palat 20 ngut ki khynnah.
U Greneth M. Sangma u la thoh sha u Sub Divisional School Education Officer, South Garo Hills ban dawa leh eiei pyrshah ïa u Headmaster, u Headring M. Marak.
“Um shym la shimkhia ïa ki kam, u la jah na skul, bad u la ïoh pdiang ïa ka tulop jong u mynta la shiphew snem,” la ong u Greneth ha ka shithi.
Katkum ka jingong jong u Greneth, ki la don bun tylli ki jingujor pyrshah ïa u Headring, bad ka jingai RTI lem bad ka jingshah sospon, bud sa ka jingthung kam biang kam shym la pynkylla ïa ka jinglong jong u.
Ka komiti ba pynïaid ïa ka skul, ki paidbah, bad ki nongïalam shnong ki pyntikna ba u Headring um shym la wan sha skul naduh u snem 2015 haduh u snem 2025 hynrei la siew pat ïa u wat hapdeng ka jingpep skul jong u.
“Ka Managing Committee ka la aiti ïa ki jingujor la bunsien hashuwa, bad kim sngewhun ba ym shym la leh eiei pyrshah ïa u Headring M. Marak,” la ong u Greneth. Kane ka jingbym shimkhia kaba la kynnoh ka la pynlong ïa palat 20 ngut ki khynnah pule ban pep skul noh shiteng por, ha kawei ka liang kaba la pynsniewdur pat ïa ka lawei jong ki.
Na ka liang u Greneth, u la dawa ban weng kam noh mardor ïa u Headring, ban thung da uwei pat u nonghikai bathymmai uba tbit, ban leh eiei pyrshah ïa u Sub Inspector of Schools namar ka jingbym pyndep hok ïa ka kamram bad ka jingbamsap, bad ban tohkit bniah halor katei ka jingjia.
Ka shithi ka la kut da ka jingdawa na bynta ka shithi weng kam hapoh 15 sngi katkum ki kyndon ka pule-puthi bad ki kyndon treikam ka Sorkar.
