Shillong, Nohprah 08
Ha ki por ba la dep ki paidbah nongleit nongwan na ka shnong Majai ki hap ban shong kali palat kynta ban poi ha ka shnong Pynthaumdan (Ichamati) namar ka jingsniew jot rathai ka surok. Hynrei ha kine ki sngi kane ka surok kaba jrong 9KM tam ka la kylla dur bad pynsuk shibun ïa ka leit ka wan jong ki nongshong shnong khamtam ki trok kit Mawshun kiba rung khaïi sha Ri Bangladesh lyngba ka Majai Land Custom Station.
Kane ka surok ka dei kaba la pynrung ha ka Pradhan Mantri Gram Sadak Yojana (PMGSY) bad pyntrei da ka ophis Executive Engineer, PWD (Roads) cum PIU PMGSY Sohra Division bad bei tyngka 14 klur tam da ka Ministry of Rural Development ka Sorkar India.
Ka shnong Majai ka hap hapoh ka jingpeit jingkhmih jong ka Hima Sohra, kaba hap hapoh ka Shella Constituency, ka dei ka kad khaïi bar Ri kaba heh bha kaba ka Sorkar India bad Sorkar Jylla ki ïoh ban lum ïa ka khajna ba bun man la u snem.
Kane ka jingshna bha ïa ka surok PMGSY ka kut tang haduh Lailad ka shnong Majai, katba ka surok na Lailad shaduh jaka ba rung ki kali kit Mawshun sha Ri Bangladesh ka dei kaba hap ha ka jingpeit jingkhmih ka Hima Sohra ka dang long ka surok kaba sniew bad jot rathai ha kaba ki trok kit Mawshun ki hap ban shu ksaid ban poi sha Export Point, watla ka jingrung ki trok khaïi sha Ri Bangladesh ka la kiew bha bad katkum ki jingtip ba la ïoh, la ong ba ka poi sha ka 450 haduh 500 tylli man la ka sngi.
Ha kawei pat ka liang, ka surok ba napdeng ka shnong Majai kata naduh Lailad shaduh ba pynïasoh bad ka surok Border ruh ka dang sahkut hapdeng ka jingtyrwa ban shna bha ïa ka bad ki nongshong shnong ki dang don ha ka jingkhmih lynti ba kane kan urlong noh.
Shuh-shuh la ong ba ka ïoh ka kot ki nongshong shnong ha ka thaiñ ka dei lyngba ka kam khaïi Mawshun bad lada ka kam khaïi ka kiew, ka ïoh ka kot ki nongshong shnong kiba shong ïew shong hat, die jingdie bad kiwei-kiwei ki kam khaïi ha Majai ruh ka kiew.
Kane ka shnong kaba ki nongshong shnong ki dei na ki jaidbynriew bapher-bapher, ka don mynta hapdeng ka shong-suk shong-shngaiñ khlem kino-kino ki jingwit, watla don ka jingïakren ba ka lah ban don jingma namar ka huri-hura ha Ri Bangladesh. Hynrei ki nongshong shnong ki pynpaw ba ki long phikir bad husiar bha na ka jinglah ban don kiba thmu rung be-aiñ sha ka Jylla lyngba katei ka thaiñ.
La bynrap ruh ba ki nongshong shnong ki angnud ba ka jingker sainar kum u pud hapdeng ka India bad Bangladesh ruh ban pyndep noh. Ïa kane ka jingpynpaw ki nongshong shnong la mynjur ruh da kiba trei ha ki ophis Sorkar ha katei ka bynta bad bynrap ba ki kam ki jam ki tyllun bad ïaid beit ïaid ryntih.
Ki don ki jingïakren ba ka surok PMGSY kaba dang shu pyndep shen kan long u budlum ïa ka khaïi pateng ban kyntiew pat ïa ka ïoh ka kot, hynrei ka donkam pat ka jingsumar da ki kontraktor kumba long katkum ki kyndon lane da ki nongñiah trok bad kiba ïaid ba ïeng lyngba jong ka. Ha ki por ba kham mynshwa shi lynter kane ka surok yn lap ïa ka jingdheng kali namar ka jingthut ki trok kiba ïaid ryngkat ki jingkit ba khia hapdeng lynti hynrei mynta pat ki nongñiah trok ki pynpaw ba ki la suk shibun bad ki la lah ban ïa beh bun trip watla ki sngewdiaw ïa ka surok na Lailad sha Export Point.
Shuh-shuh ka la mih ka jingkyntu ïa ka Sorkar Jylla ba kan phai khmat ban pynbha ïa ka surok na Sohbar kaba wan sha Lailad kaba la pynsohsat ïa ki nongleit nongwan kumjuh ki trok kit mawshun kiba wan na sha thaiñ Sohbar.
