Jowai, Nohprah 08
Ka Jaiñtia National Council (JNC) Western Zone ka la kyntu ïa ka jingtuklar lem jong u Myntri ka tnad ka koit ka khiah u Ma Wailadmiki Shylla bad u Mission Director ka National Health Mission (NHM) u R Chitturi na ka bynta ban pynbeit ryntih bad pynskhem (regularize) ïa ka jingshakri jong ki nongtrei kontrak kiba la slem hapoh ka Mission ha ka Jylla.
“Ngi la aiti ïa ka dorkhas kaba kyntu ban kyntiew ïa ka jingsiew bad ban pynskhem ïa ki nongtrei kontrak hapoh ka NHM khamtam kito kiba la shakri la palat shiphew snem ha ka kam,” ong u President ka JNC -WZ u Hamehi Bamon ha ka 8 tarik Nohprah.
U la ong ruh ba u Chitturi u la pynpaw ka jingsngew ïahap ïa ka jingkyrpad jong ka seng bad u la kular ban rah ïa kane ka kam bad ka Sorkar Pdeng.
U Hamehi Bamon u pyntip ruh ba na ka liang u Myntri ka tnad ka koit ka khiah u la kular ïa ka kynhun ba un shim ïa ki sienjam ban pynthikna ba ki nongtrei kontrak kin ïoh ïa ki tulop jong ki kaba ïahap bad ka tulop jong ki nongtrei ba pura ne permanent.
“Katkum ka jingong jong u Myntri, ka Sorkar kan ym iehnoh ïa kito kiba la aiti la bun snem ha ka NHM. Lada jia ba ka kam kontrak jong ki nongtrei kan kut noh ha ki por ba dang ïaid, ka Sorkar kan wad da kiwei pat ki lad aikam na ka bynta jong ki katkum ka jingdonkam,” u la ong.
