Mawkyrwat, Nohprah 08
U Executive Engineer jong ka PHE Mawkyrwat Division u Bah K Nongbsaw ha kajuh ka por uba dei u Member Secretary ka District Water Mission SWKHD ryngkat u Bah I Kharbundon, SDO PHE Mawkyrwat Division, Bah E Khongthiang, SDO (TC), Bah Steven Wahlang District Project Manager JJM SWKHD ha ka 8 tarik u Nohprah, 2025 ki la hiar jurip ïa ka shnong Nongsynrieh South West Khasi Hills District kum shi bynta ban buddien ïa ka jingpyntrei ïa ka skhim JJM hapoh kane ka shnong.
Ha kane ka sngi la ïadonlang ki nongïalam shnong bad ki nongkitkam ka VWSC bad ïa kane ka skhim la pyntrei lyngba ka Retro Fitting Scheme jong ka Jal Jeevan Mission kaba la dep pyntrei naduh ka snem 2023 bad ha kane ka jingjurip la lap ba baroh ki longïing kiba don kumba 168 tylli ki la ïoh ïa ka umbam umdih ha manla ki thliew ïing kumjuh ruh ki skul, ki Aganwadi centre, ka sub- centre bad ‘Public Toilet’.
Kane ka shnong ka la ïoh ruh ïa ka jingithuh kum ka Har Ghar Jal Village kaba baroh ki longïing longsem ki jaka ai jinghikai, ki jaka sumar ki la ïoh ïa ka umbam umdih.
Shuh shuh ha kane ka jingjurip, u Myntri shnong Nongsynrieh u Bah Rolan Nonglang u la ïoh ruh ban pynsngew ha u Executive Engineer ïa ki jingeh jong ki paidbah nongshong shnong ha kaba ïadei bad ka skhim JJM. U la ïathuh ba watla ki pipe um ki la poi ha manla ki thliew ïing hynrei kaba sngewsih ka long ba ki paidbah kim ïoh ïa ka umbam man ka sngi kumba long lem kiwei ki shnong hynrei ki ïoh tang lai sien ha ka shi taïew bad kane ka la wanrah jingeh shibun ïa ki paidbah nongshong shnong.
Kumta na ka liang ka shnong ka la kyrpad ïa ka Sorkar kumjuh ruh ïa u Executive Engineer ban pynïoh skhim um kyrpang sa kawei ha kane ka shnong namar kumba long mynta ïa ka tyllong um la tan tang na kawei ka pump kaba don ha shnong Jashiar kaba hap ban sam umbam ruh ïa kiwei ki shnong kum ka Pynden Mawthawiang, Mawthawiang Nongtraw bad Pharmahiong.
Ha kaba ïadei bad kane, u Executive Engineer u la ïathuh ba na ka liang ka tnad PHE ka khlem shongthait ka la dep ban jurip bad ïoh ïa kawei ka tyllong um ha Rohdam hajan ka shnong Mawthong ha kaba la dep ruh ban shna ïa ka DPR bad phah sha ka Sorkar bad u kyrmen skhem ruh ba lada ka Sorkar kan ïoh ban mang pisa ïa kane ka skhim baroh ki longïing ha Nongsynrieh kin sa ïoh ïa ka umbam umdih kaba man ka sngi.
