Shillong, Nohprah 08
Ki Nongïalam ka District Council Court Bar Association (DCCBA) ha ka 08 tarik u Nohprah 2025, ki la wan ban pynshai paidbah ha kaba ïadei bad ka jingdon ki briew kiba la pyndonkam thok ïa ka ‘Signature’ ne ka jingsoi kum ki Magistrate.
Haba kren sha ki lad pathai khubor ha Shillong Press Club, ka Kong Saphira Marbaniang, Secretary ka District Council Court Bar Association ka la ïathuh ba ka jinglap ïa kane ka jingleh thok jong ki briew, kadei na ka daw ba kawei ka briew ka la wan ban phah pynbeit ïa ki jingbakla ha ka Birth Certificate sha District Council Court.
“Haba ngi la pan ïa ka hukum ba la pass mynshwa ngi lap ba ka jingsoi kam dei na ki Magistrate napoh ka District Council,” la ong ka Kong Saphira.
Ka la ong ruh ba ki dkhot jong ka Executive Committee ka KHADC ki la ujor ejahar halor kane ka jingpyndon kam bakla ïa ka jingsoi ïa ka kyrteng jong u Magistrate. “Mynta kane ka kam ka dang ïaid ha ka jingtohkit jong ki bor pulit,” ka la bynrap.
Shuh shuh ka la ong ba don kiba la kjit pisa na ki briew kiba phah leh ïa ka Birth lane ki Death Certificate, kaba ka kam ka dei jong ki muktiar.
Ka Kong Saphira ka maham tyngeh ruh ïa ki Cyber ba kim dei ban leh ïa ki Affidavit, namar ba ka long be-aiñ ba kim dei ki muktiar (lawyer), da kaba ong ruh ba wat ki muktiar (lawyer) ki donkam ban ïoh lisen ban leh ïa kane.
“Lada ngi hap ban long ki muktiar ngin hap ban pule ngin hap ruh ban ïoh ïa ka lisen. Ki paidbah lada ki donkam ban ïakren sngewbha wan shakhmat ban ïakynduh beit ïa ki muktiar,” ka la ong, da kaba maham jur ruh sha ki paidbah ba lada jia kaei-kaei ngin nym lah ban ïarap ïa kiba kum kita bad ngin kheiñ beit ba ki long be-aiñ.
Kumta ka la kyntu ruh ïa ki paidbah kiba donkam ban leh ïa kine, ba ki dei ban leit beit sha ki muktiar (lawyer) lada ki donkam ban leh ïa ka Affidavit namar ba ka jingleh jong kiwei ka long kaba be-aiñ bad ka long ruh ka jingduh nong ïa ki, ba ki hap ban shim shibun ka pisa.
