Raipur, Nohprah:
Ki la don haduh 12 ngut ki dkhot kiba la iehnoh ïa ka rukom pyrkhat bad treikam jong ka seng CPI (Maoist) bad ki la pyndem wait ryngkat bad ki tiar ïaleh jong ki ha Rajnandgaon distrik, kaba jngai kumba 100 km shaphang sepngi jong ka Raipur, ha ka por mynstep jong ka lah sngi U Blei.
Napdeng kine kiba la aiti ïa ki tiar ïaleh, u dei uwei u heh nongïalam jong ka kynhun Maoist jong ka Maharashtra-Madhya Pradesh-Chhattisgarh (MMC) zone bad u dkhot jong ka Central Committee, u Ramdher Majji, uba la rah ïa ka khusnam kaba T.1 klur ha ka khlieh jong u.
Ki saw ngut ki dkhot jong ka Divisional Committee bad katto katne ngut kiwei pat ki dkhot ruh ki la leit pyndem noh.
Ïa kane ka kynhun leit pyndem, la lamkhmat da u dkhot ka Central Committee, la shim ba ka dei ka jingpynphai kylla kaba khraw ïa ka MMC unit jong ka CPI (Maoist) kaba la shah ñiew beaiñ.
Hynriew ngut na ki 12 ngut ki dkhot ka kynhun ki dei ki kynthei, kiba katkum ka jingong jong uwei u heh pulit, la paw ba ki la shah pynshlur da ka polisi leit pyndem bad ka jingpynbha pat ïa ka jingim jong ka sorkar jylla.
