Shillong, Nohprah 08
Ka Elaka Mawmluh, Mawmluh Sirdarship, East Khasi Hills District, ka maham pyrshah ïa kino-kino ki riew shimet ne ki seng/ki kynhun ban dawa pisa na ki kali kit jingkit kiba ïaid lyngba ka Elaka Mawmluh. La shem ruh ba ki ju don ki riew shimet ne ki seng kiba dawa pisa na ki kali kit jingkit ha ka kyrteng jong ka shnong Mawmluh. Kumta ka bor Elaka ka khang pyrshah ïa kane.
Ha ka kyrwoh khubor ba la pyllait da u Secretary, Mawmluh Sirdarship, Bah Banlam K Lyngdoh u la ong, lada lap ïa kino-kino – la ki nongshong shnong ne kiba nabar shnong – kiba pynïeng bad dawa pisa na ki kali kit jingkit hapoh u pud u sam jong ka Elaka Mawmluh, ka bor Elaka kan pynshitom da kaba tyngeh.
Lada lap ïa kino-kino ki ‘riew shimet ne ki seng/kynhun kiba dawa pisa na ki kali kit jingkit da kaba kam ba ki dei ki nong Mawmluh, ka bor Elaka kan pynshitom da kaba tyngeh.
Ha kajuh ka por ka bor Elaka Mawmluh, namar ka jingthut eh ha ka thiah ka dem ha ka por mynmiet, kam lah shah shuh ïa ka jingïaid khlem por khlem samoi jong ki kali kit jingkit lyngba u pud u sam jong ka. Ka jingleh jong ki nongñiah kali ne ki trai kali ka long kumba kim kheiñ shuh ïa ka hok ki nongshong shnong ban ïohthiah bad jahthait. Kumta da kane ka kyrwoh la khang pyrshah ïa ki kali kit jingkit – la ka long ki kali ba don ka mar hapoh ha ka por ba hiar ne ki kali thylli kiba kiew – ban ïaid lyngba ka Elaka Mawmluh hadien ka 11 baje mynmiet. Lada don kiba ïaid palat ïa katei ka por, ka bor Elaka ka don ka hok ban pynsangeh bad tohkit.
