Jowai, Nohprah 08
Ka Jaiñtia Student Union (JSU) kala maham tyngeh ïa ka North East Frontier Railway (NFR) halor ka jingthmu ban leh ‘Survey’ ïa ki ar tylli ki jaka ban pynpoi lynti rel sha Jowai.
Haba kren sha ki lad pathai khubor, ka JSU kala ong hadien ba ka la ïohi ba ka Sorkar India kala ai jingmynjur ha ka mang tyngka jong u snem 2024-2025 ban leh ‘Survey’ ïa ki ar tylli ki jaka ki ban pynpoi lynti rel sha Jowai, kata ka line kaba nyngkong la tip kum ka Jowai Khliehriat Chandranathpur kaba jrong 79 Kilometre bad ka line kaba ar la tip kum ka Chaparmukh Jowai kaba jrong 180 km. Kumta ka JSU Sengkmie ka la maham jur ïa ka Sorkar ba kam dei ban leh da ka bor ïa kane ka mat. Ka daw ba ka Jaiñtia Students Union ka pyrshah ïa ka rel namar ba ym pat don ïa ki aiñ kiba pyrkhing ban tehlakam ïa ki briew kiba nabar ban wan shapoh ka Jylla. Ka JSU ka la maham ruh ïa ka Jaiñtia Hills Autonomous District Council ba kam dei ban pyndonkam bakla ïa ka bor haba ïadei bad kane ka mat.
