Shillong, Nohprah 08
U Lamphang ka ïingdorbar thawaiñ ka Jylla, Thomas A Sangma u la pyntip ba ka jingtei ïa ka ïingdorbar thawaiñ ba thymmai ha Mawdiangdiang, New Shillong Township, kan sa dep noh pura hapoh u bnai Jylliew, 2026.
“Ka por ban pyndep ïa ka Assembly Hall kan dang ïai neh kumjuh, ha kaba la buh ïa u bnai Jylliew 2026 kum ka thong ban pyndep noh pura. Tang mar ïa dep ka ‘main hall’, ka jingshong dorbar jong ka ïingdorbar kan sa long noh ha kane ka complex,” la ong u Thomas A Sangma.
U Thomas u la pyntip ïa kane hadien ba u la lum ïa ka jingïalang bishar kam ha ka sngi Nyngkong, ban shim jingkheiñ ïa ki jingïaid ki kam ba ïadei bad ka jingtei ïa ka ïingdorbar bad ban leh eiei halor ki jingeh kiba mih haba pyntrei ïa ka projek.
U Lamphang u la pynpaw ba ka jinglum ïa ka jingïalang bishar kam ba manla u bnai kala ïarap bha ban pynjanai ïa ka rukom peit pyrman ïa ka kam bad ka jingnang ïaid ki jingtrei.
“Nga sngewtynnad ban pyntip ba ka jingïalang ka long kaba seisoh bha. Da kine ki jingïalang bishar kam ba man ka por, ngi la lah ban peitngor bha ïa ka jingïaid ki kam bad ban ithuh ïa kiei kiba donkam ban leh katba ki jingpyntrei ki dang ïaid shakhmat,” u la ong.
U Thomas u la pyntip ruh ba un sa leit ban jurip biang ïa kane ka projek ha ka 11 tarik Nohprah ban peit dalade ïa ka jingïaid ki kam bad ka rukom pyntrei ïa ki kam.
Ha kane ka jingïalang la wan ban ïashimbynta da u Symbud Myntri Rangbah ba khmih ïa ka tnad Parliamentary Affairs Bah Prestone Tynsong, u Commissioner & Secretary ka Meghalaya Assembly Bah Andrew Simon bad ki heh ophisar ka tnad Finance, PWD, NIC bad kiwei-kiwei.
