Shillong, Nohprah 08
Ka lahduh jong ka Shillong Premier League, ka Langsning FC bad lahduh jong ka First Division, ka Nongkseh SC ki la long ba la pynkhreh na ka bynta ka jingïakhun semi final kaba nyngkong jong ka SSA Champion Cup 2025, ka ban long ha ka sngi Ba-ar ha SSA Stadium kaba ha First Ground, Polo.
Kane ka jingïakhun semi final kan long ha ka por 4:30 nohphai sngi.
Ha ka sngi kaba bud ka jingïakhun ïa ka semifinal kaba ar kan long hapdeng ka Shillong Lajong FC pyrshah ïa ka MLP F.T.
Ka Langsning ka dei ka kynhun kaba la bat ïa ka kyrdan ba nyngkong ha ka Group-A kata hashwa ïa ka Meghalaya Police F.T, katba ka Nongkseh ka la wan ha ka kyrdan ba-ar na ka Group-B kata hadien ïa ka Shillong Lajong FC. Kine baroh saw tylli ki kynhun ki la kamai mar 10 point hadien ba ki la jop mar lai sien bad ïakhaid mar shisien na ki saw sien ïakhun.
Lada yn ïaphai sha kane ka jingïakhun, ka Langsning FC ka la lah ban buh jaka ïalade sha kane ka kyrdan ïakhun hadien ba ka la lah ba kan pynliem da 6-0 kol ïa ka Mawkasiang.
Kumba ka paw ka Langsning ka long kaba khlaiñ bha ha ka bynta kaba shadien, ha ka la shah thep tang shi kol, na ki saw tylli ki jingïalehkai.
Hynrei haba phai sha ka Nongkseh SS&CC, kaba la thaw ïa ka rekod kum ka kynhun kaba khlem pat shah rem na ki 13 sien ïakhun ha kane ka samoi ïalehkai jong ka SSA, ha kaba sdang shwa da ki 9 tylli ki jingjop ha ka lympung ïakhun ka First Division, hashwa ba kan jop lai sien bad ïakhaid shisien ha ka Champion Cup.
Kum ka kynhun naduh kaba sdang ka samoi ïalehkai, ka don ïa ki katto katne ki rangïalehkai kiba long shisha u budlum ïa ka kynhun lyngba ka jingïalehkai bha jong ki kum u Chesterpaul Lyng-doh bad u Hardy Cliff Nongbri, kiba tehlakam bad pynskhem bha ïa ka bynta ba hapdeng, sha-khmat pat u Kitboklang Pale bad u Kynsaibor Lhuid bad u rangapkol u Daraphun Talang. Ha ka bynta kaba shadien ka don ïa u Arlangky Nongsiej, Mebankhraw Wahlang bad Banpynkhrawnam Nongkhlaw.
Te kumta la khmih lynti ba kane ka jingïalehkai semi final kan long kaba itynnad bad ka ban pynhun ïa ki paidbah ki ban pyndap ïa katei ka stadium.
