Shillong, Nohprah 08
Ka Sorkar Meghalaya ka la bthah ïa ki bor pynïaid district ban pynshisha ïa ka jingkam ba ym pat lah ban pynshisha ba ki lai ngut ki nongbylla tih dewïong ki la shah tep im hapoh ka krem dewïong kaba la twa ha shnong Thangskai.
Haba kren sha ki lad pathai khubor ha ka sngi Nyngkong, u Symbud Myntri Rangbah ba dei khmih ïa ka tnad Kam Pohïing u Bah Prestone Tynsong u la pynpaw ba haduh mynta ka Sorkar kam pat ïoh kaiphod halor kane ka jingjia.
“Ngim pat ïoh kano-kano ka kaiphod mynta, ha ka jingshisha, nga la dep bthah ïa ki bor pynïaid district jong ka East Jaiñtia Hills jong ngi ban wad bniah la ka long ne em kaba shisha. Hynrei haduh mynta, ngim pat ïoh jingtip halor kata,” la ong u Bah Prestone.
Kane ka jingkren jong u Symbud Myntri Rangbah ka long hadien ka jingkynnoh jong ka BJP halor ka jingdon ka jingtih dewïong beaiñ hapoh ka Jylla. U Bah Prestone u la pynthikna ba ka Sorkar ka dang trei ban talasi ïa ka jingtih dewïong be-aiñ bad ka long kaba shimkhia ban weng ïa katei ka jingeh.
“Da kaba ïathuh ïa phi ngi ju don ha ka kam ban peit bniah bad ban poi shano-shano ruh ba ngi ïoh jingtip lada ka don ne em ka jingtih beaiñ. Bad kata ka dei ka jingtreikam kaba dang ïaid shakhmat kaba ngi dang leh bad ngi pyrshang katba lah ban pynthikna ba ka jingtih beaiñ kan nym don satia,” u la ong.
U Bah Prestone u la kubur ïa ki jingeh ha kaba tehlakam ïa ka jingtih beaiñ, da kaba kdew ïa ka jingjngai jong ki par. “Hooid, ki don ki jingeh namar ki jaka ba ngi hap ban leit, phim lah wat, ym don lad ban leit. Phi hap ban leit kjat, ka shim por ym duna ïa ka san kynta, hynriew kynta, ban hiar sha trai ki riat ba jrong,” u la ong.
U Symbud Myntri Rangbah u la ban jur ba ka Sorkar ka pyrshang katba lah ban khanglad ïa ka jingtih dewïong be-aiñ bad ka la bthah ïa ki bor pynïaid district ba kin kham shimkhia ban weng ïa kane ka jingeh.
“Ngi dang pyrshang katba lah bad ngi la bthah ïa ki bor pynïaid district ba kin kham shimkhia ha kane ka bynta, ban pynthikna ba ka jingtih beaiñ kan ym jia,” u la bynrap.
