Shah byrngem pynbthei bom ki liengsuiñ ha Hyderabad

Hyderabad, Nohprah:

Ki bor pynïaid ha ka kad liengsuiñ Rajiv Gandhi jong ka Hyderabad, ki la shah buh ha ka jingmaham ha ka por mynmiet jong ka Sngi U Blei, hadien ba ki email kiba byrngem pynbthei bom, ki la thmu ïa ki lai tylli ki liengsuiñ kiba wan, kynthup ïa ar tylli kiba wan na Europe, ong ki tyllong khubor jong ka kad liengsuiñ.

Kine ki jingbyrngem, ki dei kiba la pynmih pyrshah ïa ka liengsuiñ jong ka British Airways, BA 277 na London Heathrow, ka LH 752 jong ka Lufthansa na Frankfurt, bad ka liengsuiñ jong ka IndiGo ka 6E 7178, kaba wan rung na Kannur, ong ka tyllong khubor.

Wat hapdeng ki khubor kiba pyntieng, baroh ki liengsuiñ ki la pyndep ïa ka jingleit jong ki khlem kano kano ka jingjia.

Ki liengsuiñ jong ki ri ka pyrthei ki la hiar ha ka por mynstep jong ka lah sngi U Blei, katba ki liengsuiñ jong ka ri ruh ki la hiar suk, la ïathuh ki heh sorkar.

Hadien ki jingpynbna, ki kynhun jong ka kad liengsuiñ ki la pyntreikam ïa ki rukom treikam ba pura jong ki ban ïarap ba kyrkieh. Kine ki sienjam ki kynthup ïa ka jingpynkynriah ïa ka liengsuiñ sha ki jaka ba kyrpang, ka jingpynlong ïa ki jingpeit bniah ïa ki nongleit nongwan bad ki tiar, ka jingpynlong ïa ki kynhun pynlip ding bad ki kynhun pyllait im, bad ka jingpynpoi ïa ki kynhun jong ki ksew smadien ban pynkhuid ïa ka liengsuiñ bad ki jaka ba marjan. Ïa kane ka jinghikai pahara kaba dei ban leh la pynlong na ka bynta kawei pa kawei ka liengsuiñ katkum ka kyndon, la ong uwei u heh sorkar, katkum ka kaiphod.

Ym shym la lap ei ei kaba suba hadien ba ki bor synshar ki la wad bniah lyngba kine ki liengsuiñ, bad kane ka jingbyrngem pynbthei bom kaba khatduh eh ka lah ban dei ka jingthok, la pynpaw ki khubor.

Kane ka dei ka sien kaba lai kaba kum kane ka jingpyntieng ha ka kad liengsuiñ hapoh shi taïew. Ha ki jingjia kiba la dep dang shen, la ïoh pdiang bun tylli ki email ba byrngem pynbthei bom na ka bynta ki liengsuiñ jong ka Emirates’ Dubai-Hyderabad bad ki liengsuiñ IndiGo kiba ïaid na Madina bad Sharjah sha Hyderabad. Katei ka liengsuiñ, kaba kiew na Sharjah, ka la shah pynkylla lynti sha Mumbai, katba ka liengsuiñ IndiGo kaba leit sha Madinah-Hyderabad, ka la hiar kyrkieh ha Ahmedabad.

Ka jingtohkit halor ka tynrai jong ki email byrngem ba thymmai ka dang ïaid shakhmat, ha kaba haduh  mynta dang ap ïa ki jingtip ba kham bniah.