Shillong, Nohprah 08
Ka Argentina kaba la bat ïa ka nam lahduh bad ka Spain kaba long ka kynhun ba khlaiñ bor na Europe ki la don ha la ki jong ki group ha ka jingpynïakap (draw) jong ka FIFA World Cup 2026 ha kaba u President jong ka U.S u Donald Trump u la ai ïa ka khusnam jingsuk kaba thymmai jong ka FIFA.
Ïa kane ka jingpynïakap la pynlong ha Kennedy Center kaba ha Washington, ha kaba long ka jingkheiñ na ka bynta kane ka lympung kaba la pynïar haduh 48 tylli ki kynhun ha kaba ka lympung bad mynta ka dangsah sa hynriew bnai.
Ka Argentina hapoh ka jingïalam u Lionel Messi kum kapten, kan sdang ïa ka jinglehkai nyngkong pyrshah ïa ka Algeria, kumjuh ïa ka Austria bad ka Jordan, kiba don ha ka Group-J
Ka Spain, kaba dei na ki kynhun ba paw bad kaba long ruh ka lahduh ha Europe, kan sdang ïa ka jingïalehkai jong ka pyrshah ïa ka Cape Verde, kaba dang ïoh rung ha ka sien kaba nyngkong, ha shwa ba kan ïakhun pyrshah ïa ka Uruguay bad Saudi Arabia ha ka Group-H.
“Ka jingïaroh baroh kan ym pyntlot ïa ngi namar ka long pyrshah,” la pynpaw u coach ka Spain, u Luis de la Fuente. “Ngi kwah ban leh eiei kaba khraw ha kane ka World Cup bad kata ka mut ban pynthikna ba ngin ïalehkai bha ha ka jingïalehkai group bad nangne ngin nangjam shaphrang.” Kumjuh u Thomas Tuchel jong ka England, uba la khmih lynti ban khur ïa ka jingjop ha ka World Cup ha ka sien kaba nyngkong naduh u snem 1966, u la khmih lynti ban khur jingjop ha ka jingïalehkai jong ka Group-L kaba don lang ka Croatia, kaba la shah rem ha ka phainal 2018 bad kumjuh ruh ka Ghana bad Panama.
Katba ka France kaba la jop ar sien, kan ïakhun pyrshah ïa ka Senegal bad ka Norway kaba don ïa u Erling Haaland ha ka Group-I, kumjuh ïa ka kynhun ka ban khur jingjop ha ka play-off na Iraq, Bolivia lane Suriname.
Ha ka sien kaba nyngkong, ïa kane ka jingïakap la leh ha ka rukom ban pynthikna ba ki saw tylli ki ri kiba don ha ka kyrdan ba hakhlieh kum ka Spain, Argentina, France bad ka England kim lah ban ïakynduh shwa ka semi final, lada baroh saw tylli ki don ha la ki jong ki group.
Lada ki kynhun ba paw ki la lah ban pyndep nyngkong ha la ki jong ki group jong ki, ka England ka lah, kum ka nuksa, ban shem ïalade ban ïakhun pyrshah ïa ka Mexico ha ka Mexico City ha ka pre-quarter final bad nangta ïa ka Brazil ha ka quarter final, shwa ban ïakhun pyrshah ïa ka Argentina ha ka semi final.
Ïa kane ka lympung yn pynlong ha United States, Mexico bad Canada naduh 11 tarik u Jylliew haduh 19 tarik u Naitung, bad sa 16 tylli ki kynhun la kynthup biang kaba pynïar na ki 32 tylli ki ri ha u 2022. Kane ka mut ba kin don haduh 104 tylli ki jingïalehkai, haba ïanujor na ki 64 ki jingïalehkai jong ka World Cup ba la lah.
Kumba ka paw ka US kan ïoh ban pynlong khambun ki jingïalehkai kynthup ïa ka final ka ban long ha MetLife Stadium shabar ka New York, lai na ki 16 tylli ki jaka yn long ha Mexico bad ar ha Canada.
Ka Mexico kaba long kawei na ki ri ban pynlong ïa kane ka lympung, kan ïakynduh nyngkong ïa ka South Africa ha ka Group-A ka ban long ha ka 11 tarik u Jylliew ha Estadio Azteca kaba ha Mexico City.
Ka Brazil hapoh ka jingïalam u Carlo Ancelotti bad ka kynhun kaba la don semi final ha u 2022 ka Morocco ki la don ha ka Group-C, kaba kynthup lang ïa ka Scotland bad ka Haiti.
Ki kynhun ki ban ïakhun pyrshah ïa ka Germany ha ka Group-E kin long ka Ivory Coast, Ecuador bad ka Caribbean, katba ka kynhun u Cristiano Ronaldo (Portugal) kan ïakynduh pyrshah ïa ka Uzbekistan, Colombia bad kawei ka ban jop ha ka ‘play-off’.
Ka United States kaba ïoh pynlong ïa kane ka lympung, ka la shah kynthup lang ryngkat ka Paraguay, Australia bad kawei ka ban khur jingjop ha ka play-off (Europe), ki ban don ha ka Group-D.
