Shillong, Nophrah 08
U Working President ka Khun Hynñiewtrep National Awakening Movement (KHNAM) kata u Bah Thomas Passah ha ka 08 tarik u Nophrah 2025, u la ïathuh ba u Secretary ka Secretariat Administration Department u la khot ïa ki dkhot ka KHNAM ban pynshai ha kaba ïadei bad ka jingpan Right To Information (RTI) ka seng na ka tnad SAD.
Haba ïakren bad ki lad pathai khubor u Bah Thomas u la ong ba ka jingpan RTI ka seng, ka long ban ai ïa ki thup kyrteng kiba ka SAD ka siew tulop sha ki nongtrei kiba don da ki spah ngut man u bnai.
U la ong ba ka tnad kam shym lah ban ai ïa ki kyrteng jong kita kiba trei, hynrei ha ka RTI kaba ar ki ai pynban ïa ka jingdon ki nongtrei ym ïa ka thup kyrteng.
“Nga la ïoh ïa ka shithi na u Secretary ka SAD ban don ka ‘hearing’ halor kane ka RTI, bad kane ka ‘hearing’ ka long kaba sngewtynnad,” la ong u Bah Thomas.
Shuh shuh u Bah Thomas u la ong ruh ba kane ka jingpan RTI, kam dei ba kin tip bniah ïa uno-uno u briew hynrei ka dei tang ka jingkwah tip bniah namar ki paidbah ki don hok ban tip ba ïa ka pisa jong u paidbah shano la siew ïa ka tulop.
Nalor kata, u la ong ba kane jingpan RTI kadei ban pynthikna, ba ka jingbamsap bad ki jingthung kam be-aiñ kan nym don ha ki tnad treikam bapher-bapher jong ka Jylla khnang ba ka jingthung tang ïa ki briew jong ki Myntri Sorkar kan duh jait ha ki tnad bapher-bapher.
“Ngi da kyrmen ruh ba hadien ka jingpynshai jong ka seng ïa ka nongrim sha u Secretary, ba ngin sa ïoh noh ïa kane thup kyrteng. Ynda ngi la ïoh ïa ka thup kyrteng ngin sa sdang ban trei ïa ki kam khnang ban ïathuh sha ki paidbah ïa kaei kaba ngi lap,” la bynrap u Bah Thomas.
