Shillong, Nohprah 08
Ha ryngkat ka jingïalam u Chairman Bah Joinsing Dkhar bad u Vice Chairman Bah Shairong Khongtangkut, ka Sur U Paidbah ka pynmih ïa kane ka kyrwoh halor ka jingpynksan jong u Phonis Khongstid ïa ka jingmih ka Ri Bam Syiem ha Raid Nongkhlieng lyngba ka RTI bad u la pynshai ruh ba la don lypa ha ki pateng mynbarim, hynrei da tih bniah ka sur u paidbah, ha ki pateng ym pat ju don mynno kum kata ka Ri Bam Syiem, hynrei tang kaba ki paidbah ki tip ka long tang ka Ri sawdong pud.
Ka Sur U Paidbah ka pan map sha u paidbah namar ba ka jingpynmih paidbah ka la shim por, hynrei ka dei namar ba ka dang wad bniah na ki bun ngut ki Sordar barim ban lap bha ïa ka jingshisha halor kane ka jingmih kyndit ka Ri Bam Syiem sha ophis ka SDO.
Halor ki jingkynnoh bad ki kyntien pynksan kiba u Phonis Khongstid, Sordar Raid Nongkhlieng, u la pynmih, ka Sur U Paidbah ka pynpaw ba kam pdiang satia ïa kine ki jingkynnoh. Kam pdiang ruh ban ïakhun ne ïakren tang lyngba ki rynsan social media hynrei na ka liang ka sur u paidbah kam don ka bor ban lum ïa ka dorbar pyllun bad haba la kyrpad ïa u Sordar ban lum ïa ka Dorbar ruh, u sngap jar, te ka don kaei-kaei sha lyndet.
Ka jingkwah jong ka Sur U Paidbah ka long ba u Phonis Khongstid un wan ban lum ha ka Dorbar Pyllun, ban pynshai paidbah shai kdar-haba lieh haba shai mano ba ai, mano ba pynbiang, bad kaei ka jingshisha halor ka Ri Bam Syiem.
