Shillong, Nohprah 09
Ka Sorkar Jylla ka la mynjur ban pynskhem ïa ka kam jong palat 221 ngut ki nos (Bonded Nurse) bad ‘Paramedic’ kiba la shah thung (kam) hapdeng u snem 2008 bad 2012.
Haba pynbna ïa kane ka rai hadien ba la pynïaid ïa ka jingïalang ka Kynhun Myntri ha ka Sngi Ba-ar, u Myntri Rangbah ka Jylla, u Conrad K. Sangma u la ong, “Hadien ki jingïakren ba bniah bad ka tnad ka koit ka khiah lem bad ki nos (Bonded Nurse), ka Kynhun Myntri ka la rai ban ithuh ïa ki jingthung kam ba la leh ha katei ka por. La thungkam ha katei ka por bad la bud ruh ïa ki rukom treikam, bad kumta, ka Kynhun Myntri mynta ka sngi ka la rai ba ki 221 ngut ki nos (Bonded Nurse) bad ki ‘Bonded Paramedic’ kiba la shah thung kam hapdeng u snem 2008-2012, ngi la rai ban pynskhem ïa kito ki jingthung kam kiba la leh bad ban ithuh ïa ki.”
“Te kumta, yn ym ïaid shakhmat bad ka jingpynrung kam na bynta kito ki kam naba ngi la dep ban mynjur bad ithuh ïa ki jingthung kam ba la leh ha kata ka por tang na ka bynta ki nos (Bonded Nurse) bad ki ‘Bonded Paramedic’,” u la bynrap.
U Myntri Rangbah u la ong ba ki nongtrei ‘Adhoc’ ki dei ki nongtrei kiba la thung katkum ki kam ba la mang hynrei ym shym la bud ïa ka rukom thung kam kumba ju leh bad la shu thung ïa ki da kaba bynrap ba ka Sorkar ka la shim ïa ka rai kaba kyllum ban pynbna ïa ki kam jong ki nongtrei ‘Adhoc’ ba la thung hadien u snem 2007 ban pyntikna ïa ka jinglong hok bad ka jingshai.
Hynrei u Sangma u la kdew ba ka mat ba ïadei bad ki nos (Bonded Nurse) lem bad ki ‘Paramedic’ ka long kaba kham pher.
“Haba ngi la ngam kham jylliew ha ka rukom treikam, ngi la sngewthuh ba ki nos (Bonded Nurse) – ka rukom jied, wat haba ki leit na ka bynta ka jingpule, la dep ban jied bad katkum kata, la soi ïa ka jingïateh bad katkum kane, la ai ïa ki jingthung kam,” u la ong.
U Sangma u la ban jur ba ki nos (Bonded Nurse) bad ‘Paramedic’ ki la ïaid lyngba ka jingshah jied bad ki la soi ïa ka jingïateh, kaba dei ka jingïateh katkum ka aiñ.
“Haba ngi ïohi ba shi bynta jong ka jingïateh kaba don hangta bad ka jingshisha ba ka don ka jingïateh kaba long katkum ka aiñ kaba la buh, ïa kaba la pynduh biang ha u snem 2013, ngi la shim ïa ka rai da ka jingsngewthuh ba namarba la ïaid shakhmat bad kine ki jingïateh bad ki jingthung kam, ngin ithuh ïa kito ki jingthungkam bad ngin ailad ïa ki ban bteng ban trei,” u la ong.
