Shillong, Nohprah 09
U Symbud Myntri Rangbah ba khmih ïa ka tnad PWD (Roads) Bah Prestone Tynsong ha ka sngi Ba-ar u la shong ïa ka jingïalang bishar kam halor ki jingtyrwa ban shna ïa ka flyover bad ki project jingkieng ba thymmai ha Sor Shillong.
Haba kren sha ki lad pathai khubor hadien ba la pynïaid ïa ka jingïalang, u Bah Prestone u la ong ba ka Sorkar Kmie kala mynjur ban pynjlan ïa ka jingjrong jong ka flyover haduh Barik Point ha ka jaka ban pynkut tang haduh ka petrol barim kaba don ha Lad Anjalee.
“Katkum ka jingtyrwa ba mynshwa, ka flyover kan kut tang haduh ka lad Anjalee Petrol Pump barim hynrei hadien ba ngi kyrpad ïa ka Sorkar India ban pynjlan ïa ka jingjrong ka flyover haduh Barik Point, kila ai ïa ka jingmynjur,” la ong u Bah Prestone bad bynrap “Mynta wat ïa ki kam jaka, ka jingpynwan dur ïa ka flyover la nang pynkhreh da ka NHIDCL”.
Shuh shuh na ka liang jong u Symbud Myntri Rangbah u la pynbna ruh ba ïa ka jingkieng ba thymmai bala shna hakhrum ka jingkieng pung Umiam, yn sa sdang pyntreikam noh na ka bynta ban ïaid ki kali naduh u bnai Lber 2026.
Ka jingkieng kala jan dep artad bad ka jingshna ïa ka surok sha katei ka jingkieng ruh kala ïaid bad haba kut u Lber yn sa lah ban pyndonkam noh ïa ka bad hadien ba dep kine ki kam, baroh ki bos night super, ki trok kit mar ki lah ban ïaid na kane ka jingkieng.
