Shillong, Nohprah 09
Ka North Eastern Council (NEC), kaba hap hapoh ka tnad Development of North Eastern Region (DoNER) jong ka Sorkar Pdeng, ka la pyllait T.8,46,81,382 klur ha u bnai Naiwieng, na ka bynta ki prokram kam pynroi bapher-bapher ha ka Jylla.
Ka pisa kan kyrshan ïa ki jingtei ba ïadei bad ki kam ïalehkai bad ki samla, ka jingpynïasoh lyngba ki jingkieng, ki shlem na bynta ban ai jinghikai (pyntbit) ïa ki sap ki phong, bad ki kynhun shna tiar kiba ïadei bad ka lad kamai, ban pynbha ïa ki lad pynïasoh bad ki lad ki kabu ha ka liang ka jingïoh.
Ïa ka ïingmala ba ïadei bad ki kam khaïi katkum ka juk mynta (Modern Commercial Complex), kaba la shna ha Barik Point, Shillong, ha ka jinglut kaba T.22.73 klur, la pyndep ha ka 11 tarik Naiwieng, 2025.
Kane ka projek kaba la pynwandur da ka Meghalaya Industrial Development Corporation Ltd, ka thmu ban pynkylla ïa ka ‘Gram Shilpa’ kaba la don lypa sha ka ïew kaba khie im na ka bynta ki mar Khadi and Village Industries (KVI).
Ka projek ka pynmih ïa ki kam ki jam ba kongsan – naduh ki nongtrei (ha la ki jong ki jong ki kylla) ha ka por ba shna haduh ki nongdie, nongpynïaid, bad ki nongpynbit-pynbiang ha ka por ba treikam.
Da kaba pynbiang ïa ka rynsan kaba kyrpang bad kaba katkum ka juk ba mynta ban pyninam ïa ki mar jong ka KVI, kane ka ‘Plaza’ kan pynïar ïa ka ïew ka hat na ka bynta ki nongtrei kti jong ka thaiñ. La khmih lynti ba kane kan kyntiew ïa ka jingdie bad jingïoh jong kito kiba trei ïa ki kam shna kti, ki jaiñ, ki mar ba la shna na ka snieh, ki tiar pynbhabriew, bad ki marbam.
Ka NEC ka la pyllait haduh T.56,22,37,739 klur na ka bynta ban bei pisa ïa ki projek ha kylleng ki 8 tylli ki Jylla ka Thaiñ Shatei Lam Mihngi ha u bnai Naiwieng, 2025. Ka pisa kan kyrshan ïa ki tamasa bapher-bapher ha ka liang ka kolshor, ki ‘Seminar’, ki jingwad bniah, bad ki sienjam ba ïadei bad ki kam pynroi, kaba pyni ïa ka jingangnud jong ka NEC ban pynkhlaiñ ïa ki jingtei ha ka liang ka roi ka par, ban kyntiew ïa ka lad kamai, ka kolshor, jingwad bniah bad ki buit treikam bathymmai hapoh ka thaiñ.
Nalor ki jingpyllait ba kyrpang sha ki Jylla, ka NEC ka la pyllait ruh T.14,89,90,034 klur sha ki Central Agency bad ki kynhun ba khmih ïa ka kolshor, kaba kyrshan ïa ki jingïalang kum ka ‘Purvottar Hindi Samagam’, ‘Lamka Youth Summit’, ‘North East Riders Meet’, bad ki ‘workshop’ halor ka jinglong-jingman suiñbneng bad kiwei-kiwei.
Ki jingïarap ba kongsan na bynta ki projek ki kynthup ïa ki ‘Community Development Initiatives for Indigenous Groups’, ka jingseng ïa ki jaka pynmih jingbam na bynta ki jingri bad ki jaka ri sniang katkum ka juk stad saian, ka jingpynkhlaiñ ïa ka teknoloji STINER ha kylleng ka Thaiñ Shatei Lam Mihngi nalor kiwei.
Ïa kine ki sienjam la pyntreikam lyngba ki tnad treikam ka Sorkar Pdeng ba kynthup ïa ka North Eastern Region Community Resource Management Society (NERCORMS), North Eastern Development Finance Corporation (NEDFi), CSIR-North East Institute of Science & Technology (CSIR-NEIST), bad Education & Research Network (ERNET), bad kiwei.
