Shillong, Nohprah 09
Ka Sorkar Kmie ka la pyllait ïa ka pisa kaba long T.95 klur kum ka jingsiew bailutksan khyndew (land compensation) na ka bynta ban pyntreikam ïa ka Package III jong ka Pynursla Bypass jong ka projek surok Shillong-Dawki.
Ïa kane la pyntip da u Symbud Myntri Rangbah ka Jylla ba khmih ïa ka tnad PWD (roads), Bah Prestone Tynsong hadien ba la pynïaid ïa ka jingïalang bishar kam ba la ïashim bynta lang da ki ophisar jong ka National Highways and Infrastructure Development Corporation Limited (NHIDCL) ha ka sngi Ba-ar.
U Bah Prestone u la pynbna ba kane ka pisa bailutksan na ka bynta ka Package III, Pynurlsa Bypass, ka dei kaba la dep pyllait da ka Sorkar India, ha kaba T.95 klur la mang na ka bynta ka jingsiew bailutksan jaka.
“Shen na ka liang u District Collector jong ka East Khasi Hills kumjuh ruh SDO Civil Pynursla kin sa lah ban pynbit pynbiang bad ki jingtip jong baroh ki nongïalam bad trai bad hadien kata yn sa pyllait ïa ka pisa bailut ksan jaka sha ki bank account jong ki baroh,” la ong u Bah Prestone haba kren sha ki lad pathai khubor.
Haba pynpaw ïa ka jingsngewhun halor ka jingïaid jong ka kam jong kiwei pat ki packages jong ka Shillong-Dawki Road Project, u Bah Prestone u la ong, “Nga dap da ka jingkmen ban pyntip sha phi ba ka package I, II, IV, V, bad ka jingïaid ka kam ka long kaba pynhun.”
Ha kaba ïadei bad ka Package I, u Bah Prestone u la pynbna ba ka NHIDCL bad ka kompeni kaba pyntrei ïa ka kam, ka la buh thong ban pyndep noh ïa ka surok fourlane haduh Baniun Pomlum hapoh ka 31 tarik Nohprah, 2025.
U Symbud Myntri Rangbah u la pynpaw ba ka jingïaid jong ka kam ha ka Package II, IV, bad V ka long kaba biang, ha kaba la shim ruh ki lad ki lynti ban peit bad ki jingeh kiba ktah ïa ka mei mariang.
“La dep ban ai jingbthah sha ka kompeni kaba pyntrei ba kan pynthikna ba ki jingbthah ba la pynmih da ka Meghalaya State Pollution Control Board, ba dei ban bud ryntih,” u la bynrap.
