Washington, Nohprah:
U heh ka tnat kam poh iing jong ka US, u la iathuh ba ka America ka la dep pynduh noh ïa ki 85,000 tylli ki Visa ha kylleng ki bynta tang hapoh jong une u snem, da kaba pynshai ba kane ka jingleh jong ka US ka long shi bynta jong ka jingpyrshang kaba jur ban ïada ïa ki jaitbynriew jong ka ri America bad ban pyntreikam ïa ki kyndon jingïada naka bynta ki paidbah.
“Ngi la weng noh ïa ki 85,000 tylli ki visa jong baroh ki jait, kynthup ïa palat 8,000 ngut ki samla pule, kaba long palat ar shah ïa ka jingkheiñ ha u snem ba la dep,” la nog utei u heh ka tnat kam pohïing haba jubab ïa ka jingkylli jong ki nongthoh khubor.
“Katto katne na ki daw ba kongsan balei ba ngi la weng noh ïa ki visa ki dei ki DUI, ki jingshah thombor bad ki jingtuh, kiba ryngkat ki long haduh shiteng na ki jingshah weng ha u snem ba la dep. Kine ki dei ki briew kiba buh jingma ïa ka jingshngaiñ jong ki shnong ki thaw jong ngi bad ngim kwah ban pynneh ïa ki, ha ka ri jong ngi,” ong une u heh sorkar uba khlem kwah ban pynpaw kyrteng.
Shuh- shuh ruh u la ong ba ka rukom bishar bniah jong ka sorkar ka dang long kaba pyrkhing bha, khamtam eh na ka bynta ki nong-aplai na ki jaka ba don jingma. Halor ka Afghanistan, u heh sorkar u la ong: “Nga pyrkhat ba kane ka sorkar ka ju don ka jingsngewkhia halor ka jingshngaiñ ha Afghanistan [hadien ka jingweng noh] bad ban pynthikna ba ngi lah ban peit bniah bad pynshisha ha ka rukom kaba biang ba ki nongaplai visa kin ym long ka jingma.”
Haba pynkynmaw biang ba yn nym pynstet ïa ki jingpeit bniah ïa ki bor pahara, une u heh sorkar u la bynrap, “Ngin shim por katba ka shim por, bad ngin ym ai visa tad haduh ba ngin da thikna ba u nongaplai um buh jingma ïa ka jingshngaiñ bad jingshngaiñ jong ki nong America.”
La kylli ruh ïa une u heh sorkar hato ka jingïashim bynta ha ki jingpyrshang ban wad bniah ïa ki jingshisha ne ban pynbeit ïa ki jingthoh – kynthup ïa ka jingtrei na ka bynta ki social-media ne ki sengbhalang – ka lah ban long ka nongrim ban kyntait ïa ka visa katkum ki polisi ba la buh dang shen jong ka sorkar Trump.
Hynrei une u heh sorkar u la bynrap ba kum kine ki case ym ju bishar bniah da kawei ka kyndon.
Kane ka jingkhmih bniah kaba jur bha ka long hadien ka US ka la iai bteng ban pyrkhing bha ïa ki rukom rung briew bad ki rukom peit bniah hadien ka jingmih noh ki shipai na Afghanistan ha u snem 2021, kaba la pynlong ïa ki hajar ngut ban wad jaka sah ne visa lyngba ki prokram ba kyrpang jong ka US. Ki heh sorkar jong ka America ki la pynksan bunsien ba baroh ki nongaplai na Afghanistan ki dei ban pyndep ïa ki jingpeit bniah ba bun jait – ka rukom treikam kaba la pynlong ïa ka jingpynslem kaba slem hynrei ka dang long ka pdeng jong ka polisi pahara jong ka ri jong ka US.
