New Delhi, Nohprah:
Ka IndiGo ka la pynsangeh noh haduh 500 tylli ki liengsuiñ ha ka sngi Ba-ar, kaba la pynthut ïa ki jingpyntreikam jong ka kad liengsuiñ ha ki phra sngi lynter, la ïathuh ki tyllong khubor.
Ka Bengaluru bad ka Delhi ki la ïohi ïa ki jingpynthut kiba kham jur shuh shuh.
La pyntip ba ki don 121 tylli ki jingpynsangeh treikam na Bengaluru, ba kynthup ïa 58 ki jingwan kit bad 63 tylli ki jingmih ban leit shawei pat. Ki la don 152 tylli ki liengsuiñ kiba la shah pynsangeh na Delhi.
Ha Hyderabad Airport, ki liengsuiñ kiba la shah pynsangeh ki long 58 tylli, kiba wan ki long 14 tylli bad kiba mih ki long 44 tylli.
Ki liengsuiñ kiba la shah pynsangeh ki long 81 tylli na Chennai, 31 tylli na Mumbai, 26 tylli na Lucknow bad 16 tylli na Ahmedabad.
Ka jingeh kaba dang ïaid shakhmat ka lah ruh ban pynduhnong ïa ka IndiGo katto katne ki lynti ha ka por Tlang kaba mynta.
U Myntri ka Union Civil Aviation u K. Rammohan Naidu, u la ong ba ka sorkar kan “thikna” ban ot noh ïa ka jingai bhah ïa ka kompeni liengsuiñ kum ka jingpynshitom.
“Ngin sa pynmih ïa ka hukum ban pynduna ïa ki katto katne ki lynti ïaid na ka por Tlang jong ka IndiGo. Ïa kine yn aiti biang sha kiwei pat ki nongkit bad pynphai biang sha ka IndiGo tang ynda ka la pyni ïa ka jinglah ban pynïaid ïa ki,” ong u Naidu ha kawei ka lad phah khubor.
Ka IndiGo ka pyntreikam palat 2,200 tylli ki liengsuiñ man ka sngi ha kylleng ki 90 tylli ki jaka hapoh ka ri bad palat 40 tylli ki jaka shabar ri. Tang ha ka lah sngi U Blei, ka la pynsangeh noh palat 560 tylli ki liengsuiñ ha kylleng ki hynriew tylli ki kad liengsuiñ metro kiba heh namar ba ki jingeh ha ka jingtreikam ki dang ïai bteng ban nang kiew.
