Shillong, Nohprah 09
U Bah Prestone Tynsong, Symbud Myntri Rangbah ka Sorkar Jylla ba khmih ïa ka tnad Transports u la pyntip ba ka Sorkar ka la rai ban pynheh haduh 12 meter ïa ka surok, ba kynthup ïa ki nala bad kynroh kaba long na Umiam Ri-Bhoi District shaduh Mawlai Nongkwar, East Khasi Hills District.
Haba kren sha ki lad pathai khubor ha ka sngi Ba ar jong ka taïew, u Bah Prestone u la ïathuh ba na ka liang ka National Highways & Infrastructure Development Corporation Limited (NHIDLC) ka la ai jingmut ban pynheh haduh 12 meter ïa ka surok na Umiam sha Mawlai kaba dei ruh ka surokbah (National Highway 06).
“Shen kan don ka jingleit jurip hapdeng ki tnad bapher-bapher, kynthup ka tnad PWD, MeECL bad ka ophis Deputy Commissioner,” la ong u Bah Prestone.
U Bah Prestone u la ïathuh ruh ba ka jingheh jong ka surok Umiam-Shillong mynta kadei tang 7.5 meter bad na ka liang ka NHIDCL ka la ai jingmut ban pynheh noh sha ka 12 meter, namar kadei ka surok kaba kongsan, ka ban pynïasoh ïa ka Ri-Bhoi bad kiwei ki District jong ka Jylla nalor ïa ki Jylla ka thaiñ Shatei Lammihngi (North East) bad ka Meghalaya.
“Ha ki sngi ban wan kan sa don ka jingleit ban jurip hapdeng ka NHIDCL, MeECL, PWD ïa ka bynta jong ka surok na Umiam sha Mawlai ban pynheh sa 12 meter bad hadien ka jingjurip na ka liang ka NHIDCL kan khot tender ban sdang pyntrei noh ïa ka surok” la ong u Bah Prestone.
U Bah Prestone u la pyntip ba u la bthah ruh ïa ka ophis Deputy Commissioner ban lum ïa ki kot ki sla haba ïadei bad ka jingsiew bai lutksan sha ki trai jaka ha shi lynter ka surok na Umiam Ri-Bhoi District shaduh Mawlai Nongkwar, East Khasi Hills District.
