Khliehriat, Nohprah 09
U Myntri Rangbah ka Jylla u Conrad K Sangma ha ka 8 tarik Nohprah u la pynlong ïa ka jingïalang bishar kam ha kaba ïadei bad ki skhim sam um, kum ka Functional Household Tap Connections (FHTC) bad Rymbai Greater Water Supply Scheme (RGWSS) ba la pyntreikam da ka PHE Electrical Sub-Division, Rymbai.
Na ka liang ki ophisar ki la pynsngew ruh ïa ki jingeh kiba kum ka Sub Division ka ïakynduh, bad pynpaw ruh sha u Myntri Rangbah halor ka jingïaid jong ki kam bad ka por ba la buh ban pyndep ïa ki skhim bapher-bapher jong ka tnad hapoh ka thaiñ.
Ki ophisar ki la pynpaw ruh ïa ka jingdonkam ban don ïa ka PHE Division ha East Jaiñtia Hills District khnang ban lah ban pyntreikam bha bad ban bishar bniah ïa ki skhim.
U Myntri Rangbah u la bthah ruh ïa ki ophisar ban pynthikna halor ka jingtreikam ki FHTC ha baroh ki Anganwadi Centre bad ki skul bad ban jur halor ka jingdonkam ïa ka jingïatreilang jong ki nongshong shnong lyngba ki jingpynshai paidbah bad ki jingïashim bynta jong ki nongshong shnong na ka bynta ki jingpyntreikam kiba jop ïa ki skhim bapher-bapher ka PHE.
U la ong ruh ba katba ki jingpyntrei ïa ki kam pynroi ki dang ïaid shakhmat da ki tnad bapher-bapher ka long kaba kongsan ban pynthikna ba ki tyllong um ki dei ban ïoh ïa ka jingïada khnang ba ki kam pynroi kin ym pynthut ne ktah ïa ki tyllong um na ka bynta ki skhim bapher-bapher ka PHE.
