Shillong, Nohprah 09
Ka Hynñiewtrep Integrated Territorial Organisation (HITO) Sengkmie ka la pynshai sha ki paidbah ha kaba ïadei bad ka mat kaba ka seng ka la leh ha ki bnai ba la dep kata ban buddien ïa u mawshun uba shalan sha ki 7 tylli ki karkhana dewbilat ha East Jaiñtia Hills District.
Haba ïakren bad ki nongthoh khubor ha ka sngi Ba-ar, u Bah Wanbun Dkhar Secretary u la ong ba ka seng ka la buh jingkylli ba ha kano ka nongrim ba ka Sorkar Jylla ka ai jingmynjur lane ai jingithuh ïa u Mawshun namar ka aiñ kam kdew ba ka Sorkar Jylla lane kano-kano ka bor ba kan ai jingithuh ïa u mawshun sha ki karkhana dewbilat.
U Bah Wanbun u la ong ba ka Sorkar Jylla ka la pynkheiñ ïa ka aiñ ba la shna da ka Sorkar India namar ïa ka MMDR Act 1957 la shna da ka Sorkar India bad kane ka pynpaw ba kam kheiñ snep ïa ki aiñ ka Sorkar India.
Ka seng ha kaba ïadei bad kane ka la wad da ka RTI na ka ophis Director of Mineral and Resources bad ka la ïoh bad ban pynshai paidbah.
Ha kane ka RTI ka seng ka la buh jingkylli ba haduh katno ka tnad mining and geology ka ïoh khajna lyngba kine ki ‘incidental limestone’.
Ka seng ka la ïoh ka jubab ba haduh 259 klur 80 lak 29 hajar 5 spah 65 tyngka ki ïoh ka khajna na kine ki ‘incidental limestone’.
“Kane ka long katkum ka dor kaba ki siew khyndiat khynsoit kum ban shu pyni da rapjot ba ki leh mynleh ba ki siew khajna sha ka Sorkar hynrei ha ka jingshisha haba kheiñ lang ba dei ban ïoh na baroh kine ki karkhana dewbilat ka long kaba heh bha kata 572 klur 20 lak 76 hajar 448 tyngka bad kane ka pynlyngngoh ïa ngi,” ong u Bah Wanbun.
U la ong ruh ba kane ka dei ka dor lada ki shim thik na ka dor kaba la buh da ka Sorkar kan poi 572 klur 20 lak 76 hajar 448 hynrei ka DMR ka lum tang 259 klur 80 lak 29 hajar 5 spah 65 tyngka bad kane ka la pynlyngngoh ïa ka seng ha kano ka rukom ka Sorkar ka ailad ïa kine ki karkhana dewbilat.
Ka seng ha ka 9 tarik u Nohprah 2025 ka la leit ban ïakynduh ïa u Secretary ka tnad mining and geology ban pan jingshai halor kane ka bynta ha kaba u Secretary u la kular sha ka seng ba un buddien ïa kane ka kam.
Ka seng ka la ong ba ïa mynta kan dang ai por ïa ka tnad mining and geology ban shimkhia ban buddien ïa kane bad lada ka tnad kam leh eiei ka seng kan ujor da ka PIL.
