Shillong, Nohprah 09
Namar ka jingdon jong ka jingïakajia bad ka jingkylli halor ka jingpynïaid ïa ki ar tylli ki jaka jngohkai ha Daiñthlen bad Weisawdong, ka Executive Committee jong ka Khasi Hills Autonomous District Council (KHADC) ka la rai ban thung hi noh da u nonglum pisa katba ym pat lah ban pynbeit ïa ka kam.
Ha ka 4 tarik u Nohprah, 2025, u Secretary ka Executive Dorbar, Hima Sohra u la ïoh pdiang ïa ka jingthoh na ka ophis u Deputy Secretary ka Executive Committee ka Khasi Hills Autonomous District Council halor ka phang kaba ong, ka jingmudui pyrshah ïa ka rai u Syiem Sohra kaba ïadei bad ka adong shnong Laitduh, Umblai, Mawphu bad Laitlyndop.
Ha katei ka jingthoh la ong ba ka la don ka jingpyntip kaba la wanrah sha ka Executive Committee, KHADC katkum ka jingmudui ha ka 21 tarik u Naiwieng, 2025 ba ki jaka jngohkai ha Daiñthlen bad Weisawdong ki don hapdeng ka jingïakajia bad ka jingkylli halor jingpynïaid ïa kitei ki jaka jngohkai ka dang sahteng.
La ong ba da kaba shim kabu ïa ka jingïakajia ba dang sahteng, u Syiem ba la khlad noh bad ka Dorbar Hima Sohra ka la shim pynïaid ïa kitei ki jaka jngohkai bad lum pisa, bai rung bad kiwei-kiwei ki jingsiew.
Shuh shuh la wanrah sha ka Executive Committee ba ka don ka jingdie bad ai jaka pathar kumjuh ki jingtei kiba la shna hajan bad marjan ki jaka jngohkai wat hapdeng ka jingïakajia.
Ka jingthoh ka la ong ba ka long kaba donkam ba ka pisa paidbah ka dei ban buh bha katba ym pat dep pynbeit ïa ki kam ïakajia bad ban tehlakam ïa ki jingtei ha kitei ki jaka jngohkai kiba hap ha ka Ri Raid.
La pynsngew ba u Secretary bad ka Executive Dorbar Hima Sohra ban bud hynñiew tylli ki kyndon kata ba baroh ka jinglum ïa ka pisa lane kiwei-kiwei ki jingsiew ha ki jaka jngohkai ba don jingïakajia ba la lum da ka Hima Sohra dei ban sangeh shi syndon.
Kaba ar ka long ba baroh ki jingdie, ka jingaiti, ka jingai NOC lane kino-kino kiwei-kiwei pat kiba ïadei bad ki jaka ha kitei ki jaka jngohkai bad ki jaka ba marjan la khang tad haduh ban da pynbna da kumwei pat.
Kaba bud ka long ba ki jingtei, ki jingshna bad ki kam kyntiew ïa ka roi ka par ha kitei ki jaka jngohkai ruh la pynsangeh shipor haduh ban da pynbna da kumwei bad bynrap ba ka District Council kan thung ïa u nonglum pisa na ka bynta ban pynïaid bad ban peit shipor ïa ka jinglum pisa na ki jaka jngohkai.
La bthah ba nangne shakhmat dei ban kynshew ban lum pisa da u briew ba ithuh da ka Council, ym da uno uno u riew shimet ne ki nongkitkam ka Hima.
Shuh shuh la ong ba ka Executive Dorbar Hima Sohra ka dei ban ïatreilang bad u nonglum pisa ba la thung da ka District Council bad dei ban kiar na kaba tuklar ha ki jaka jngohkai bad kano-kano ka jingpynkheiñ ïa ka hukum, kin ngat ha ki kyndon aiñ ba tyngeh.
