Shillong, Nohprah 10
Ha ka jingtrei ba jarjar khlem da paw pyrthei la 25 snem, ka Khasi Jaiñtia Christian Forum Leaders Forums (KJCLF) ha ka 10 tarik Nohprah 2025 ka la ïoh ban rakhe ïa ka Jubili Rupa bad pyllait paidbah ïa ka kot ka jingïaid lynti jong ka.
Ïa kane ka jingrakhe 25 snem jong ka Forum la pynlong ha Bianchi Memorial Hall, Laitum-khrah Shillong ha ka jingdonlang u Archbishop Victor Lyngdoh, u Rev Dr. EH Kharkongor ryngkat ki nongkitkam ka KJCLF, ki dkhot bad ki nongrwai ka kynhun Gospel Triumph Choir Laitumkhrah bad la ïoh ruh ban pyllait paidbah ïa ka kot kaba la thoh haba ïadei bad ka jingïaid lynti ka Forum kaba la ai kyrteng “Ka Jingïaid Lynti Ha Ki Ar Phew San Snem” ba la pynlait da u Rev. Bishop Purely Lyngdoh.
Haba ïoh ban ïakren bad u Rev Dr. EH Kharkongor Secretery KJCLF u la ïathuh ba la seng ïa ka Furom ha u snem 2000 ha ka por ba ka Jylla ka dap da ki jingshah pyntieng pynsmiej da ki kynhun bunjait namar ka jingbymïoh kam jong ki khun samla kaba la pynlong ïa ka Jylla ban ym shngaiñ ha ka imlang ka sahlang, dei halor kane ka nongrim ka la mih ka Furom da ka jingthmu kaba bha ban phah ïa ki jingai jing mut sha ka Sorkar.
U la ïathuh ruh ïa ki jingkynduh jingeh ha ka jingïaid lynti kum ka Furom, ba ka jingïatreilang jong ki kynhun Balang bapher-bapher ka duna palat, watla katta ruh ka Furom ka khlem shongthait hynrei ka ïai-trei ha la ka jingthmu kaba dei halor ka shongsuk shongshngaiñ khamtam ka lawei jong ki khun samla bad u la kyntu ïa baroh ki nongshong shnong ban ai ïa ka jingïatreilang.
U la ïathuh ba ka Forum ka angnud ba ki Balang Khristan kin kner ïa ki kti jingïarap bad ai ka jingïatreilang na ka bynta ka jingbha jong ki nongshong shnong. U la ong ba “ki jingeh ha kine ki sngi haba ïadei ka jingshah pynshitom beiñ ki Khristan ha ki jaka bapher-bapher jong ka ri bad ka dei ka bynta ba ki nongïalam bad ki riewngeit na ka thaiñ Shatei Lam-Mihngi ki dei ban shimkhia ban sngewthuh ïa ka aiñ bad ban ai ka jingïatreilang.”
Haba jubab ïa ka jingkylli, u Rev Dr. EH Kharkongor u la ong ba ka jingshongkha lyngkar kadei ka daw jong ka jyngkynrei ka jingpang HIV/AIDS, haba ïadei bad kane u la buh ka jingkyntu ïa ki Balang bapher-bapher ba kin ïashimbynta da ka jingkitkhlieh ban ïatreilang na ka bynta ban jop ïa ka jingkynrei ka jingpang HIV.
