Shillong, Nohprah 10
Ka shnong Sohmynting kaba don ha West Jaiñtia Hills District ha ka jingïatreilang bad ka Earthtree Enviro Private Limited ha ka sien kaba nyngkong eh ka la ïoh ban pynlong ïa ka tamasa Sohphlang kaba la sdang ha ka 9 tarik Nohprah 2025 kaba la pynlong ha Madan Ktieh Heh ha Sohmynting.
Ka jingpynlong ïa kane ka tamasa ka long ban pynroi ïa ki marrep tynrai, ban pynkhlaiñ ïa ka jingïatylli kum ka shnong, bad ban burom ïa ka kolshor ban pynneh ïa u sohphlang.
Ka phang pdeng ba la buh ha kane ka tamasa ka long, “Na ka khyndew ba seisoh sha ki khlaw ba jyrngam, na ka mariang ba phuh ba phieng bad ban neh ban sah u Sohphlang”. Kane ka tamasa ka la khring ïa ki nongshong shnong, naduh ki nongrep, ki samla, bad ki longkmie, longkpa.
Kane ka long ka jingpyrshang kaba ïatylli ban burom ïa ka jingstad jong ki kpa tymmen bad ban pynphai biang ïa ki jinglong jingman jong ka mariang bad ban pynroi ïa u Sohphlang. Ka Sohmynting mynshwa ka la pawnam na ka bynta ka jingpynmih Sohphlang, hynrei kane ka la shah ktah ha ka jingpynjot ïa ka khyndew, ka jingkylla ka rukom pyndonkam ïa ka khyndew bad ka jingduh noh ïa ki dieng kiba tap ha ki jaka ha kaba ki ju long khlaw mynshuwa.
U Sohphlang u dei u soh tynrai uba lah ban bam uba don ha ki lum Khasi bad Jaiñtia jong ka Jylla Meghalaya ha ka thaiñ Shatei Lam-Mihngi jong ka Ri India. Nalor ka jingpyndonkam ïa u ha ka jingshet bad ka jingsumar, ka jingdon jong u Sohplang ïa ka nitrogen ka pynlong ïa u kum uba kordor ha ki rukom rep ba la khleh lang, kaba pynbha ïa ka jinglong ka khyndew bad kaba pynkiew ïa ka jingmih bha ki jingthung ha ka rep ka riang.
Ka Shnong Sohmynting, kaba don ha ki jaka lum ka West Jaiñtia, ka pawnam na ka bynta ka khyndew rong saw kaba sboh, bad ka jingdon ïa ki khlaw ba kyntang kiba ki pateng ba hadien ki dang ïai pynneh pynsah bad sumar bha.
Ha kane ka tamasa, ki nongshong shnong na ki shnong ba marjan ki la ïawan lang ban shim bynta ha ka jingkheit Sohphlang, ki jingpyni ïa ka kolshor, ka jinglehkmen Advance Christmas, bad ki jingïakop thoh essay, jingrwai, jingshad, bad jingdro dur. Ka jingïalang ka la ai ka rynsan kaba thymmai ban pynkhlaiñ ïa ka jingïatylli ha ka imlang sahlang, ban pynim biang ïa ka kolshor, bad ban pynpaw ïa ka jingdonkam jong ki rukom treikam ban ïalam da ka longïing bad ka imlang sahlang kiba long tynrai ha ka jingburom ïa ka khyndew ka shyiap.
Ha kane ka sngi la ïadonlang ruh u MDC ka Amwi-Khliehtyrchi u Bah MB Rymbai, u COO ka Earthtree Enviro u Dr. SN Goswami bad kiwei-kiwei ki riew pawkhmat.
U Bah MB Rymbai u la ong, ka Sohmynting ka dei ka jaka ba bha tam ha ka jingpynmih ïa ki jhur. “Ka Sohmynting ka dei kaba la tip paidbah kum kawei na ki jaka pynmih jhur organic ba bha tam jong ka distrik. Da ka jingtei ïa ka ïew thymmai ha Jowai, ki samla bad kiba la nang la stad kin sa ïoh lad ban wanrah ïa u Sohphlang sha ka imlang sahlang.”
Ki nongmihkhmat na ka Earthtree Enviro, kiba pyntreikam ïa ka projek ‘Regeneration Meghalaya’ ki la ban jur ba ka kam jong ka ha Meghalaya ka long ban pynthymmai ïa ka mariang bad ka jingthung biang ïa ki dieng ki siej ban long ki khlaw ki btap.
Ka jingpynlong ïa kane ka tamasa Sohphlang 2025, ka dei ka mawjam ha ka jingïatreilang hapdeng ka Earthtree, ka projek ‘Regeneration Meghalaya’ bad ki paidbah ka Sohmynting, da kaba rakhe ïa ka dustur kaba tehsong ïa ka khyndew ka shyiap, ka kolshor, bad ka imlang sahlang. Ka Earthtree kan dang bteng ban kyrshan ïa ki jingthmu kiba kyntiew ïa ka rep ka riang kaba lah ban pynneh pynsah, pynim biang ïa ki rukom treikam tynrai, bad pynneh pynsah ïa ka mariang bad ka kolshor jong ka Meghalaya-da kaba pynskhem ba ka jingpynthymmai kam dei tang shaphang ka jingpynthymmai ïa ki khlaw hynrei ka dei ruh shaphang ka jingpynroi ïa ki lad kamai, ki riti dustur, bad ki khana pateng kiba pynneh pynsah ïa ki.
