Shillong, Nohprah 10
Ka kynhun jong ki kontraktor ka ri Khasi Jaiñtia kaba la tip kum ka All Khasi Jaiñtia Contractor and Supplier Association ha ka sngi Balang ka la pynlong ïa ka jingïalang halor ka jingbym pyllait lut ka Sorkar ïa ka Bill jong ka skhim Jal Jeevan Mission (JJM), Water Resources bad kiwei ki tnad kaba la sah naduh u snem 2019 haduh 2025.
Ha kane ka jingïalang ka kynhun ki kontraktor ka la rai ban leit ïakynduh ïa u Myntri Rangbah ka Jylla u Conrad K Sangma ban pan jingpynshai na kaei ka daw ba ka Bill jong ki nongtrei kontraktor ka sahkut haduh mynta.
U Bah Welcome Langi uba dei u President ka AKJCSA u la pynpaw ïa ka jingkynduh jingeh namar ka jingbym pyllait bill ka Sorkar khamtam ha une u bnai ba dei ka aïom lehkmen Khristmas bad u la buh ka jingkyrpad ïa ka Sorkar Jylla ba kan pyllait noh ïa ka pisa kaba dei ka bai pyntrei jong ki ïa ka Jal Jeevan Mission (JJM).
Halor ka jingong u Myntri Rangbah ka Jylla ba ka jingbym pat pyllait ïa ka bill na ka bynta ka skhim JJM ka dei namar ba ka Sorkar Pdeng ka dang pynsangeh ban pyllait pisa ha baroh kawei ka ri India, u Bah Plielad Tiewsoh President AKJCSA na Ri Bhoi u la ong ba ka jingeh jong ka Sorkar ka sah hi ha ka, hynrei ka jingeh jong ki kontraktor ka Sorkar ka dei ban peit bad ban pyllait noh ïa ka pisa, ym ban khynñiat pat sha ki kontraktor.
U la ong ba ki kontraktor ki sah ha ka umdum naba u Myntri Rangbah u kren kumta, namar ki don ki kam kiba ka JJM ka la dep la kham slem hynrei haduh mynta ym pat ïoh ïa ka bill.
Shuh-shuh u la ong ruh ba ka shem jingeh ïa ki kontraktor namar ba ma ki ruh ki don ïa ki nongtrei, ki hap ban siew bad ban ai bai Khristmas ïa ki, ha kaba kim banse ruh wat ban shim da ka ram na bank ban siew ïa ki nongtrei, kumta ki shem jingeh ban siew sa ïa ka sut ha bank lada ka Sorkar kam pyllait ïa ka bill.
