Washington, Nohprah:
U President jong ka United States, u Donald Trump, u la ong ba ka jinglong nongshong shnong trai ia kiba la kha ha US lane ka ‘Birth Right’, ka dei kaba la buh kyrpang eh na ka bynta ki khunlung jong ki mraw, ym na ka bynta ki nongwan buhai shnong kiba “riewspah” ban pynlong ia ka “iing ka sem baroh kawei, kum ki nongshong shnong jong ka US”.
Kane ka jingkren ka long hadien katto- katne sngi ba ka ïingbishar ba ha khlieh duh jong ka US ka la mynjur ban bishar bniah ïa ka jingïakynad kaba la slem bha halor ka jinglong nongshong shnong trai ia kiba la kha- la pun hapoh US.
Haba ïakren bad ka kot khubor jong ka America, Politico, une u nongïalam ka Republican, u la ïada ïa katei ka hok, kum ka hukum treikam jong u, pyrshah ïa ka jinglong nongshong shnong ba la kha bad ong ba kan long kaba “sngewsih” lada ka jingsynshar jong u, kan rem noh ha ka mukotduma ha ka ïingbishar ba ha khlieh duh.
“Kane ka mat ka long kaba sngewtynnad bha namar ka long ka mat kaba la thmu bad buh kyrpang na ka bynta ki khun- ki kti jong kito kiba shah teh mraw. Bad lada phi peit ïa ki tarik ha ka mukotduma, ka dei thik kaba ïadei bad ka thma-bah ba ar. Kata ka mukotduma kam shym la thmu na ka bynta kino- kino ki briew kiba riewspah kiba wan na kawei pat ka ri, kiba la shu wan poi wir ne shong- sah sngewbha da ka mon lade ha US, kiba la wan iuh kjat ha ka ri jong ngi,” la ong u Trump.
U Trump u la ban jur ba ka America kam lah ban ai jaka sah ïa ki phew million ngut ki briew kiba la wan rung lyngba ka jinglong nongshong shnong ba la kha- la pun ia ki hapoh US. “Haba kata ka la jia, kata ka la mut ruh tang na bynta ki khun- ki kti jong kito ki mraw bad lada phi peit ia ki tarik ba thikna ba la pynlong ia ka, baroh ki don jingiadei bad ka thma bah bad ka jingkut jong ka thma bah. Ka dei kata ka por kaba rit, bad ki briew mynta ki la sdang ban sngewthuh ia kata,” u la ong.
