Shillong, Nohprah 10
U Myntri Rangbah ka Jylla, u Conrad K. Sangma ha ka Sngi Balang u la pyntip ba ka Sorkar ka don ha ka bynta kaba khatduh haba ïadei bad ka rai ba kongsan ban pynbeit thymmai ïa ka rukom siew tulop sha kumba 20 hajar ngut ki nonghikai ‘Adhoc’ bad SSA.
Haba ai jingkren ha ka jingïalang pynhap pyrda ïa ka jingrakhe ‘Platinum Jubilee’ jong ka Umphyrnai Presby-terian School (LP Section), u Conrad u la pynpaw ba kane ka jingtyrwa ban pynbeit thymmai kan wanrah ïa ka jingskhem, ka jingshai halor ki jingpynkiew, bad ka jingshngaiñ na ka bynta ka lawei.
“Kam dei ka rukom treikam ka Sorkar, hynrei ka dei ka rukom treikam kaba thymmai kaba wanrah ïa ka jingskhem bad ka jingshngaiñ,” u la ong.
U la bynrap ba ka Sorkar mynta ka pynlut T.1,200 klur man u snem kum ka jingïarap ne ‘Grant-in-Aid’ na ka bynta ki skul ‘Deficit’ bad ‘Adhoc’ bad ki kolej, da kaba batai ïa kane kum “ka jingbei tyngka ha ka imlang-sahlang.”
U Myntri Rangbah u la kdew ruh ïa ki jingeh kiba tawiar sawdong haba ïadei bad ki kyrdan pule ki nonghikai bad kdew ba bun ki nonghikai kiba hashuwa, kim shym la kot ïa ki kyndon jong ka ri – mynta suki-suki ki la nang ïaid ban pynurlong ïa ki kyndon ba donkam, da ka jingkyrshan bad ka jinglong kylluid na ka liang ka Sorkar.
U Conrad u la ong ba ka Jylla ka don haduh kumba 25 tylli ki seng kiba mihkhmat ïa ki kyrdan nonghikai bapher-bapher, kaba ïalam pat sha ka jingpynïaid kam kaba kyllaiñ. U la pynshai ruh ba ki jingeh ki ïai bteng ban don ym namar ka jingduna nonghikai, pisa, ne ki jingduna ha ki mat treikam hynrei namar “ka rukom long kaba ïaphiah” ha ka rukom long ka tnad pule-puthi.
Ha kajuh ka por, u la ban jur halor ka jingdonkam ban peit shakhmat bad wad ïa ki lad ki lynti, da kaba pyntikna ba ka Sorkar kan ym pdiang ïa ki lynti ki ban ktah pat ïa ki lad kamai.
“Ngi dei ban shim ïa ki rai da ka jingsngewthuh, bad katba ngi dang pynbeit ïa ka rukom treikam, ngi dei ban kynthup lang ïa baroh”, u la ong.
Hadien ka jingplie ïa u maw sah kynmaw ka ‘Jubilee’, u Conrad u la ai khublei ïa ka skul kaba la kynjoh ïa kane ka thong kaba kongsan.
U la pynpaw ba ka pule-puthi ka la ïaineh kum kawei na ki mat ba kongsan jong ka Sorkar naduh u snem 2018 bad kdew ba bun ki skul Sorkar LP, UP, ‘Secondary’, bad ki ‘Higher Secondary’, ryngkat ki kolej, la pynbha lyngba ki prokram ai jingïarap bapher-bapher.
Ula ban jur ba katba ka la don ka jingnang kiew shaphrang, ka jingïaid lynti ka ïai bteng.
“La buh ïa ka nongrim, bad iwei hadien iwei, ki jingtei ha ki skul jong ngi ki la nang bha,” u la ong.
Haba phai sha ka histori jong ka skul, u Myntri Rangbah u la ïaroh ïa ka jingïai minot jong ka skul bad ka ‘Managing Committee’ ha kine ki phew snem ba la dep. U la pynpaw ruh ka jingsngewnguh ïa ka jingshakri kaba la slem jong ka Principal, da kaba kdew ba ka la rung sha kane ka skul ha u snem 1978.
“Ka long da shisha kaba ai mynsiem ba ka khynnah jong kane ka skul mynta ka la long ka Principal,” u la ong.
Haba pynbna ïa ka jingkyrshan na bynta ki jingtei jong ka skul, u la pyntip sha ka jingïalang ba yn pynbiang T.20 lak na ka Chief Minister’s Special Development Fund na bynta ban pynheh ïa ka ïingskul bad kumjuh ïa ki tiar tem na ka bynta ka skul. Hashuwa la ïoh ruh ïa ka jingkren na u Rev. C. Lamare, Headmistress, Kong B. Kharumnuid, Rangbah Shnong, Bah L. Kharkongor bad kiwei.
Ha kane ka sngi la don lang ruh u MLA barim, Bah Lambor Malngiang, kum u Symbud Kongsan, nongïalam Balang, nongïalam shnong, bad kiwei.
