Ka Meghalaya, ka Jylla kaba la pynkupbor da u slap uba bun, ki wah kiba itynnad, bad ka jinglah ban pynmih bording, ka dang ïai bteng ban mad ïa ka jingeh kaba la dei ban pynbeit la slem bha: ka jingpynlip bording man ka por. Kaei kaba la ju shim ba ka long ka jingbym suk kaba ju jia teng-teng mynta ka la kylla long ka rukom kaba pynthut ïa ki longïing, ki samla pule, ki hospital, bad ki kam khaïi ha kylleng ka Jylla.
Ka jingsahïaineh jong kine ki jingpynlip bording ka buh ïa ka jingkylli kaba jur: Balei ba ka Jylla kaba don kum kine ki jingmyntoi ba kynja mariang ka dang hap ban ïakhun ban pynbiang ïa ka bording?
Ka daw ba kongsan ka shong ha ki jingtei kiba la rim bad kiba la khia palat. Kiba bun ki transmission line bad ki substation ha Meghalaya la seng da ki phew snem mynshwa bad kim shym la ïaid ryngkat bad ka jingdawa kaba la nang kiew. Kum ka jingmih, ka system ka long kaba buh jingma haduh katta-katta; wat u slap uba rit ne ka jingtrei maramot kaba man ka por ka pynlong bad wanrah ïa ki jingpynlip bording kaba wanrah ïa ka jingdum. Ka jingthmu ne buh ïa ki ‘Shutdown’ watla ka long kaba donkam hynrei ka long pat jan manla ka por, kaba pyni bad kdew ïa ka jingeh kaba kham jylliew jong ka jingbym biang ka jingpynbha bad jingpynkylla thymmai.
Watla ka dei ka Jylla kaba pynmih bording pahuh tang ha ki kot-ka jingkhublei ka leit ïa ki hydropower projek kiba heh-ka Meghalaya bunsien ka ïakynduh ïa ka jingduna namar ka jingbym biang ki lad sam bording bad ka jingshaniah ha ki tyllong bording nabar ha ki por ba duna bording. Kane ka jingbym ïahap hapdeng ka jinglah bad ka jingshisha ka pyni ïa ki jingduna ha ka jingpyntreikam ïa ki projek, ki jingpynkylla kiba la slem bha, bad ka jingbym biang jong ka jingpynkylla dur sha ka bor sngi bad kiwei-kiwei ki tyllong kiba lah ban pynthymmai.
Ka jingpynlip bording kaba man ka por ka ju wanrah ïa ka jingeh kaba khraw ïa ki nongshong shnong bad ktah ruh ïa ka jingkiew jong ka Jylla. Nalor kane, kum ki samla pule ki mad jingeh ha kaba khreh kot, ki nongkhaïi ba rit ruh ki mad ka jingduhnong bad ruh kum ki jaka shakri kiba kongsan kum ki hospital ki ïakynduh jingeh bad wat ki lad ïakren kum ha kane ka juk ba mynta ruh ki shah ktah bha. Kum ha kane ka juk, kiba bun ki longïing ki la lah ban pyndonkam da ki kynja Solar ne ki Invertor bad kiwei ki kor hynrei lada lip slem palat ka bording ruh kine kin nym lah shan slem, watla ki la long ka jingmyntoi. Hynrei haba phai pat sha ki thaiñ nongkyndong ha kaba ka dang long kaba eh ba kin ïoh ban pyndait ïa kum kine ki kor, ka wanrah shisha ka jingeh bad ka jingktah kaba khraw bha.
Ka jinglip bording kaba khah-khah, ym tang ba ka ktah ïa ki nongshong shnong hynrei kumjuh ruh ïa ki kam jngohkai pyrthei, kaba dei kawei na ki bynta ba khlaiñ tam jong ka Meghalaya ha kaba pynmih khajna, lada kum ki hotel ne kiwei-kiwei ki bynta ym lah ban pynbiang bording.
Watla ka jingpynlip bording ka long kaba khah-khah hynrei haba peit pat ïa ka bai thang bording ne ki bill light kiba poi, kam don jinghiar ne ka jingpynduna hynrei la shim kumba ka dei ban long ne ban pynheh ïa ka bai thang bording. Kane ka la paw lyngba ka jingud jong ki paid nongshong shnong na ka por sha ka por khamtam lei ba don ka jingpynlip bording kum ha kine ki bnai ba dang don ïa ki eksamin bad kiwei-kiwei ki jingpynkhreh.
Watla ka um hapoh ka pung Umiam ka long kaba dang biang hynrei ym lah pat ban tip ïa ki daw jong ka jingpynlip bording ba khah-khah, hynrei na ka liang ka MeECL ka la pyntip ba kam dei satia ka load shedding hynrei ka jingpynlip namar ka jingdon ki kam maramot bad kiwei-kiwei. Ngim lah ban tip shuh ba hato ka dei kaba shisha ne hato don eiei sha lyndet namar watla ym don ka jinghap slap ne khyrwit jong ka lyer, nangno pat ki mih kita ki jingthut, kine ki long ki jingkylli kaba kum ki paidbah ki buh. Kumta ka long kaba donkam na ka liang jong ka MeECL ba kan pynshai kham janai halor kane ka bynta ba kan pynhun lang ïa baroh.
