Shillong, Nohprah 10
Ka North East Students’ Organisation (NESO) kala khot ban pynlong ïa ka jingrakhe “Sngi ba dum ngit’ ha baroh ki 7 tylli ki Jylla ka thaiñ ha ka 11 tarik Nohprah, kum ka dak ban pyrshah ïa ka Citizenship Amendment Act (CAA), 2019.
Ha ka kyrwoh, ka NESO kala pynkynmaw ïa ki paidbah ka thaiñ shatei lam-mihngi ba ha ka 11 tarik Nohprah, 2019, wat hapdeng ki jingpyrshah ba khlem sangeh jong ki riewlum trai muluk pyrshah ïa ka Citizenship (Amendment) Bill, 2019, ka Sorkar India kam shym la pynsngap bad khatduh lyngba ka Rajya Sabha, la ai jingmynjur ïa ka aiñ ïakjakor kaba la tip kum ka Citizenship (Amendment) Act, 2019.
“Ka NESO kala pynbna ba ka 11 tarik Nohprah kan dei ka sngi ban sah jingkynmaw kum ka “sngi ba dum ngit” na ka bynta ka thaiñ Shatei Lam-Mihngi. Kumta, kum ka jingbteng ban rakhe ïa kane ka sngi ba dum ngit, ka NESO kala rai ba kan don ka jingpynher lama ïong bad ki banner rong ïong ha baroh ki jaka ba kongsan jong ki 7 tylli ki Jylla ka thaiñ Shatei Lam-Mihngi ha ka 11 tarik Nohprah,” ka la ong.
“Ka jingrakhe ka long ban phah ïa ka khubor sha ka Sorkar India ba ngi ïeng pyrshah ïa ka Citizenship (Amendment) Act, 2019 bad ha kajuh ka por ban pynkynmaw ïa ki briew jong ngi bad ïa ki pateng ban wan sa ïa kawei ka jingleh bym hok kaba ka Sorkar India kala leh pyrshah ïa ki riewlum trai muluk jong ka thaiñ Shatei Lam-Mihngi,” ong ka kyrwoh na ka NESO. Ka NESO kala kyntu ïa ki paidbah ka thaiñ Shatei Lam-Mihngi ba kan kyrshan ïa kane ka jingrakhe bad ban bteng ha ka jingïakhun ïa la ka jong ka hok.
